वाद:शिंदे सेनेतील गटबाजी, 10 कोटी रुपयांच्या कामावरून वाद; शिवसेना जिल्हाप्रमुखाची‎ तालुकाप्रमुखाला दमबाजी‎

शिवसेनेच्या जिल्हाप्रमुखाने शिवसेनेच्याच‎ पारनेर तालुकाप्रमुखास दमबाजी करून‎ धक्काबुक्की केल्याची घटना नगरमध्ये‎ घडली. विकास रोहकले असे धक्काबुक्की‎ झालेल्या तालुकाप्रमुखाचे नाव आहे.‎ यासंदर्भात रोहकले यांनी जिल्हाप्रमुख अनिल‎ शिंदे यांच्याविरोधात कोतवाली पोलिस‎ ठाण्यात तक्रार दिली. त्यानुसार शिंदेंवर‎ अदखलपात्र गुन्हा दाखल झाला. १० कोटींच्या‎ विकास कामांच्या वाटाघाटीवरून हा प्रकार‎ घडल्याचे म्हटले जात आहे.‎ मार्केटयार्ड परिसरातील कार्यालयात‎ घडलेल्या घटनेमुळे शिवसेना वर्तुळात‎ खळबळ उडाली आहे. पारनेर तालुकाप्रमुख‎ रोहकले व जिल्हाप्रमुख शिंदे दोन दिवसांपूर्वी‎ वाटाघाटीसाठी एकत्र आले.

यावेळी ''तू परस्पर‎ कामे कशी आणली, तू, तुझा मुलगा, बायको‎ नगर शहरामध्ये कशी राहतात तेच बघतो'',‎ असे म्हणत शिंदे यांनी दमबाजी व‎ धक्काबुक्की केली. अशी तक्रार रोहकले यांनी‎ केली आहे. निधी आणि कामावरून शिवसेनेत‎ झालेल्या वादाची मोठी चर्चा रंगली आहे.‎ आगामी निवडणुकांच्या तोंडावर शिवसेनेच्या‎ पदाधिकाऱ्यांकडून विकास कामांसाठी निधी‎ मिळवण्यासाठी स्पर्धा सुरू आहे. शिंदे यांनी‎ काही दिवसांपूर्वीच १० कोटींचा निधी मंजूर‎ करून आणला आहे. त्याच्या वाटाघाटी,‎ श्रेयावरून वाद सुरू झाल्याचे या घटनेतून‎ समोर येत आहे.‎

अर्थकारणावरून शिवसेनेतील वाद ही नवीन‎ गोष्ट नाही. चार वर्षांपूर्वी छत्रपती‎ संभाजीनगर येथील पश्चिमचे आमदार संजय‎ शिरसाट यांचे सुशिल खेडकर या‎ पदाधिकाऱ्याशी विकास कामांवरून वाद‎ झाले होेते. सार्वजनिक बांधकाम विभागाची‎ एक निविदा शिरसाट यांच्या मर्जीतील‎ ठेकेदाराला हवी होती. मात्र, खेडकर यांनी‎ ऐनवेळी निविदा दाखल केली. त्यावरून‎ शिरसाट यांच्या कार्यालयासमोरच वाद झाला‎ होता. प्रकरण मारहाणीपर्यंत गेले होते.‎