राजकारण:अकोल्यातील राष्ट्रवादीचे तालुका पदाधिकारी नाराज‎‎

अमृतसागर दूध संघाच्या पंचवार्षिक‎ निवडणुकीतील मविआ‎ पदाधिकाऱ्यांच्या व विशेषकरून‎ राष्ट्रवादीच्या पदरी पडलेल्या‎ पराभवाने राष्ट्रवादीचे आमदार डॅा.‎ किरण लहामटे यांच्यावरचा राग‎ व्यक्त होताना दिसतो. राष्ट्रवादीच्या‎ तालुका पदाधिकाऱ्यांनी या‎ वर्तणुकीची तक्रार रविवारी ज्येष्ठ‎ नेते अजित पवार यांच्या कानावर‎ घातली. अजित पवार यांना संदीप‎ भानुदास शेणकर यांनी एक पत्र‎ दिले. या पत्राचे वाचन रस्त्यावरच‎ पवार यांनी केले. लागलीच मुंबईत‎ मंगळवारी, सकाळी ८ वाजता‎ पदाधिकाऱ्यांना दादांनी चर्चेसाठी‎ पाचारण केले.

बहुतांश‎ पदाधिकाऱ्यांची आमदार डॉ.‎ लहामटे व जिल्हाध्यक्ष यांच्या‎ कार्यपद्धतीवर नाराजी आहे हे‎ लक्षात घेऊन दादांनी हे पाउल‎ उचलले.‎ अकोले शहराजवळील औरंगपूर‎ फाट्यावर राष्ट्रवादीचे जिल्हा‎ उपाध्यक्ष बबन वाळुंज यांच्या‎ घरासमोर अजित पवारांची भेट‎ पक्षांतील नाराज पदाधिकाऱ्यांनी‎ रविवारी घेतली. आपला संताप‎ व्यक्त करीत संदीप शेणकर यांनी‎ अजित पवार यांना पत्र दिले.

त्यात‎ म्हटलेय, मी २०१९ पूर्वीपासून‎ राष्ट्रवादी कार्यकर्ता म्हणून काम‎ करतो. मधुकर पिचड पिता-पुत्रानी‎ राष्ट्रवादी पक्ष सोडल्यानंतर पक्षाच्या‎ २ नगरसेविकांच्या मदतीने‎ अकोल्यात राष्ट्रवादी पक्ष‎ सावरण्याचे काम केले. यातून‎ मतदारसंघात पुन्हा नव्या जोमाने‎ आपला पक्ष उभा राहीला. परंतु‎ आज मतदारसंघात पक्षाच्या‎ पदाधिकाऱ्यांसह कार्यकर्त्यांची‎ पूर्णपणे वाताहत झाली. पक्ष‎ वाढीसाठी तालुक्यातून कुणीही‎ प्रयत्न करताना दिसत नाहीत.‎ जिल्हाध्यक्ष, जिल्हा कार्याध्यक्षाकडे‎ अनेकदा तक्रारी केल्या.

पण फक्त‎ उडवाउडवीचीच उत्तरे मिळाली.‎ यापुढील काळात अकोले‎ मतदारसंघात राष्ट्रवादी पक्ष धोक्यात‎ येऊ नये म्हणूनच आपली भेट घेऊन‎ चर्चा करणे महत्वाचे आहे. हे पत्र‎ अजित पवार यांनी रस्त्यावरच‎ वाचले व ताबडतोब संबंधित‎ पदाधिकाऱ्यांना मंगळवारी (७‎ फेब्रुवारी) सकाळी मुंबईतील‎ बंगल्यावर बैठकीसाठी वेळ दिला.‎ पदाधिकाऱ्यांच्या या तक्रारी‎ जिल्हाध्यक्ष राजेंद्र फाळके, जिल्हा‎ कार्याध्यक्ष संदीप वर्पे, आमदार डॉ.‎ लहामटे व अगस्ती कारखान्याचे‎ अध्यक्ष सीताराम गायकर यांच्या‎ कार्यपद्धतीवर आहेत, याचाच भाग‎ म्हणूनकी काय, पण आमदार डॉ.‎ लहामटे सोमवारी राजूर येथील‎ आपला जनता दरबार सोडून मुंबईत‎ डेरेदाखल झाल्याची चर्चा आहे.‎

अजित पवार यांना भेटणार‎ राष्ट्रवादी पदाधिकाऱ्यांसह‎ कार्यकर्त्यांना मंगळवारी मुंबईत‎ अजित पवार यांनी भेटीसाठी‎ बोलावले आहे. पदाधिकाऱ्यांना‎ पक्षीय वाढीसाठी मतदारसंघात‎ अडचणी येतात. जिल्हा व‎ तालुक्यातील नेते याकडे दुर्लक्ष‎ करीत आहेत. तालुकाध्यक्ष भानुदास‎ तिकांडेंची भूमिकाच स्पष्ट नाही‎ म्हणून त्यांना बरोबर न घेताच आम्ही‎ पवारांना भेटणार आहोत. पण ते‎ आमच्या भूमिकेबरोबर आहेत, असे‎ राष्ट्रवादीचे माजी तालुकाध्यक्ष‎ संदीप शेणकर यांनी सांगितले.‎