निवेदन‎:रुईछत्तीशी येथील गर्भवती‎ महिलेचे मृत्यूप्रकरण तापले‎

नगर तालुक्यातील रुईछत्तीशी येथील एका‎ खासगी रुग्णालयात दाखल केलेल्या १९‎ वर्षीय महिलेचा ३१ जानेवारीला प्रसूतीदरम्यान‎ मृत्यू झाला. तिच्यावर उपचार करणाऱ्या‎ खासगी डॉक्टराकडे सनद नसल्याने, तो‎ बोगस असल्याचे निष्पन्न झाले. या प्रकरणात‎ बोगस डॉक्टरावर नियंत्रण ठेवणाऱ्या संबंधित‎ अधिकाऱ्यांविरोधात सदोष मनुष्यवधाचा‎ गुन्हा दाखल करावा, अशी मागणी जनाधार‎ संघटनेचे प्रकाश पोटे यांनी उपमुख्य‎ कार्यकारी अधिकारी सुरेश शिंदे यांच्याकडे‎ केली आहे.‎ पोटे म्हणाले, की शंकर फुलमाळी यांच्या‎ १९ वर्षीय मुलीला प्रसुतीसाठी डी. बी. बोस या‎ खासगी रुग्णालयात दाखल केले होते.

मात्र,‎ उपचारादरम्यान मुलीसह पोटातील बाळाचा‎ मृत्यू झाला. चुकीच्या पद्धतीने केलेल्या‎ उपचारामुळे माय-लेकाचा मृत्यू झाला.‎ तालुका आरोग्य अधिकाऱ्यांमार्फत संबंधित‎ डॉक्टर ज्ञानेश्वर निवृत्ती पवार याची चौकशी‎ केल्यानंतर त्याच्याकडे वैद्यकीय सनद‎ नसल्याचे समोर आले. याप्रकरणी नगर‎ तालुका पोलिस ठाण्यात गुन्हा दाखल‎ करण्यात आला आहे. संबंधित‎ डॉक्टराबरोबरच या बोगस डॉक्टरवर नियंत्रण‎ ठेवणारी यंत्रणाही तितकीच जबाबदार आहे.‎ याप्रकरणी संबंधितावर सदोष मनुष्यवधाचा‎ गुन्हा दाखल करावा, अशी मागणी आम्ही‎ जिल्हा परिषदेचे उपमुख्य कार्यकारी‎ अधिकारी सुरेश शिंदे यांच्याकडे केली आहे.‎