जागतिक महिला दिन विशेष‎:कोरोनाने हिरावलेल्या स्वप्नांना पुन्हा आकार देण्याची एकल महिलांची जिद्द‎

आयुष्याचा जोडीदार कोरानाने हिरावून‎ नेल्यानंतर उर्वरित जीवनवाट एकटीनेच‎ चालायची होती. अशा एकल महिलांची मोट‎ बांधून त्यांना स्वयंरोजगारातून उन्नती‎ साधण्यासाठी सामाजिक संस्थांनी पुढाकार‎ घेतला. कोरोनाने हिरावलेल्या स्वप्नांना पुन्हा‎ आकार देण्यासाठी महिलांनी भरारी घेण्याचा‎ निर्धार जिल्ह्यातील ३ हजार महिलांनी केला‎ आहे. त्यांच्या पंखांना बळ देण्यासाठी‎ शासनाच्या पाठबळाची गरज आहे.‎ अकोले तालुक्यातून हेरंब कुलर्णी यांनी‎ एकल महिलांसाठी कार्य करण्याचा निर्णय‎ घेऊन ‘एकल महिला पुनर्वसन’ समितीची‎ स्थापना दोन वर्षांपूर्वी केली होती. या महिलांना‎ स्वत:च्या पायावर उभे करण्याची चळवळ‎ राज्यभर जोमात सुरू झाली. या प्रयत्नांना‎ सामाजिक संस्थांचे पाठबळ मिळाले.‎ समितीच्या शासनासमवेत बैठका झाल्या.‎ त्यात एकल महिलांचा विषय अजेंड्यावर‎ राहिला. या माध्यमातून तालुकानिहाय‎ तहसीलदारांच्या अध्यक्षतेखाली वात्सल्य‎ कमिट्या स्थापन झाल्या आहेत. समितीने‎ दिलेल्या माहितीनुसार, जिल्ह्यात अशा ३‎ हजार एकल महिला असून, त्यांच्या पतीचे‎ निधन कोरोनामुळे झाले आहे.‎

तालुकानिहाय सोशल मीडिया ग्रूप सुरू‎ करण्यात आला. असा पहिला समूह अकोले‎ तालुक्यात स्थापन झाला. अनेक सामाजिक‎ संस्थांनी या महिलांना पाठबळ देण्यासाठी‎ प्रयत्न केले. ३०० महिलांना शिवणकामासाठी‎ शिलाई मशीन, २५० शेळीवाटप, पिठाची‎ गिरणी, या महिलांच्या मुलांना चांगले शिक्षण‎ मिळावे, यासाठी सुमारे ४० लाखांची मदत‎ लोकसहभागातून उभारण्यात पुनर्वसन‎ समितीला यश आले आहे. आदिशक्ती महिला‎ फाउंडेशनच्या अध्यक्ष जया पालवे, पुनर्वसन‎ समितीचे जिल्हाध्यक्ष अशोक कुटे महिलांना‎ मार्गदर्शन करीत आहेत.‎

राज्यभर वाढली चळवळ‎
एकल महिला पुनर्वसन समितीची‎ मुहूर्तमेढ अकोले तालुक्यात रोवली‎ गेली. सोशल मीडियावर ग्रूप करून‎ त्यांना एकमेकींशी जोडले. शासन‎ स्तरावर केलेल्या पाठपुराव्यामुळे‎ तालुकास्तरावर वात्सल्य‎ कमिट्यांची स्थापना झाली.‎ बालसंगोपन योजनेतून त्यांच्या‎ मुलांसाठी २५०० रुपयांपर्यंत‎ अर्थसाहाय्य मिळाले.‎- अशोक कुटे, जिल्हाध्यक्ष, महिला‎ पूनर्वसन समिती.‎

स्वप्नपूर्ती बचतगटाची‎ अल्पावधीत भरारी‎
‎आठ ते दहा एकल महिलांनी एकत्र‎ येऊन बचतगट स्थापन केला आहे.‎ त्यात कोरोनामुळे पतीचे निधन‎ झालेल्या, तसेच इतर कारणांमुळे‎ एकल झालेल्या महिलांचा समावेश‎ होता. साई ज्योती स्वयंसहाय्यता‎ प्रदर्शनात खाद्यपदार्थ स्टॉलच्या‎ माध्यमातून चार दिवसांत आम्ही दोन‎ लाखांची उलाढाल केली.‎- मेघा वरखेडकर, अध्यक्ष, स्वप्नपूर्ती‎ बचतगट‎