जिल्हा परिषदेच्या बदल्या वादात:345 शिक्षकांच्या दिव्यांगत्वाची होणार तपासणी, शिक्षणाधिकाऱ्यांनी घेतला निर्णय

जिल्हा परिषदेत झालेल्या बदलीसाठी विशेष संवर्ग एक मध्ये ज्या शिक्षकांनी अर्ज भरून बदली करून घेतली. तसेच ज्या शिक्षकांबाबत तक्रारी आल्या आहेत, अशा शिक्षकांच्या दिव्यांगत्वाची तपासणी करण्यात येणार आहे. जिल्हा प्राथमिक शिक्षणाधिकारी भास्कर पाटील यांनी ही माहिती दिली आहे. त्यानुसार सुमारे ३४५ शिक्षकांची आता फेर तपासणी होणार आहे.

जिल्हा परिषदेंतर्गत कार्यरत असलेल्या शिक्षकांच्या ऑनलाईन बदलीची प्रक्रिया नुकतीच पार पडली. काही संवर्गातील बदल्या होणे अद्याप बाकी आहे. बदलीचा लाभ घेण्यासाठी विशेष संवर्ग १ मध्ये सुमारे ३४५ शिक्षकांनी दिव्यांग प्रमाणपत्र सादर केले आहे. यापार्श्वभूमीवर बाबासाहेब महापुरे यांनी काही शिक्षकांचे प्रमाणपत्र खरे असले तरी दिव्यांगत्व खरे नसल्याबाबत प्रशासनाचे लक्ष वेधले.

बदलीसाठी दिव्यांग प्रमाणपत्र सादर करणाऱ्या शिक्षकांचे दिव्यांगत्व तपासणी करण्याच्या मागणीसाठी महापुरे यांनी २८ फेब्रुवारीपासून जिल्हा परिषदेसमोर उपोषण सुरू केले होते. शिक्षण विभागाने महापुरे यांना दिव्यांगत्वाबाबत आक्षेप असलेल्या शिक्षकांची नावे कळवण्याचे पत्र दिले. त्यानंतर महापुरे सुमारे ३४५ शिक्षकांची यादी शिक्षण विभागाकडे सोपवली आहे. त्यावर शिक्षणाधिकारी पाटील यांनी संबंधित शिक्षकांच्या दिव्यांगत्वाच्या तपासणीचे पत्र दिल्यानंतर महापुरे यांनी आंदोलन स्थगित केले.

शिक्षणाधिकाऱ्यांच्या पत्रात काय

७ एप्रिल २०२१ च्या शासन निर्णयानुसार विशेष संवर्ग भाग १ मध्ये ज्या शिक्षकांनी अर्ज भरून बदली करून घेतली व त्या शिक्षकांबाबत तक्रारी आल्या आहेत. अशा शिक्षकांच्या कागदपत्रांची पडताळणी करण्याचे स्पष्ट केले आहे. त्यानुसार सक्षम प्राधिकाऱ्यांमार्फत दिव्यांगत्वाची तपासणी करण्यात येईल, असे स्पष्ट केले.

२०१२ नंतर बदल्या पुन्हा वादात

अहमदनगर जिल्ह्यातील ७६ शिक्षकांनी बदल्या टाळण्यासाठी बनावट दिव्यांग प्रमाणपत्र सादर केल्याचा प्रकार जून २०१२ मध्ये उघडकीस आला होता. हे प्रकरण राज्यभर गाजले होते, संबंधित शिक्षकांवर कारवाई करून चाैकशी लावण्यात आली होती. आता पुन्हा दहा वर्षानंतर २०२३ मध्ये दिव्यांग प्रमाणपत्र प्रकरण चर्चेत आले आहे.