भक्तीमार्ग:पुरी झाली इश्वरसेवा, आता आमुचा राम राम घ्यावा; अवतार मेहेरबाबा अमरतिथी उत्सवाची सांगता

मेहेराबाद येथे गेल्या तीन दिवसांपासून‎ सुरू असलेल्या अवतार मेहेरबाबांच्या‎ अमरतिथी उत्सवाची सांगता बुधवारी (१‎ फेब्रुवारी) विविध भाषेतील प्रार्थना व‎ आरतीने झाली. यावेळी हजारो‎ भाविकानी ‘जय मेहेरबाबा’ म्हणत‎ एकमेकांचा निरोप घेतला.‎ मंगळवारी दुपारी २ ते रात्री १२‎ वाजेपर्यंत देश-विदेशातील लोकांनी‎ भजने, बाबांवरील सांस्कृतिक व नृत्याचे‎ कार्यक्रम, नाटक, गजल आदी‎ कलाप्रकार सादर केले. बुधवारी (१‎ फेब्रुवारी) गाणी, नृत्य, भजने झाली व‎ दुपारी २ वाजता आरती व प्रार्थना झाली.‎ चेअरमन फॉमरोज मिस्री म्हणाले, की‎ माझा जन्मोत्सव सगळीकडे साजरा करा,‎‎‎‎‎‎‎‎‎‎‎‎‎‎ परंतु अमरतिथी फक्त मेहेराबादलाच‎ साजरी करण्याचे मेहेरबाबा यांनी सांगून‎ ठेवले होते. त्यांच्या हयातीतच टेकडीवर‎ समाधीचे बांधकाम करण्यात आले होते.‎

चार बाजूला चार धर्मांची मनोरे उभारली‎‎‎‎‎‎‎‎‎‎‎‎‎‎ आहेत. सप्तरंगी ध्वज येथे सतत फडकत‎ असतो, जेणेकरून सर्व धर्म एकच‎ असल्याचे प्रतीत व्हावे.‎ अमरतिथी उत्सवात मागील तीन‎ दिवसांत लाखो भाविक येथे आले. मात्र,‎‎‎‎‎‎‎‎‎‎‎‎‎‎ कुठेही गडबड, गोंधळ झाला नाही.‎ विविध भाषिक गाणी, नृत्य, वाद्य, कला,‎ पेहेराव, नाटिका यांतून येथे सर्वधर्मीय‎ जागतिक प्रेमसंमेलन भरल्याचा भास होत‎ होता. मेहेरबाबा ट्रस्टच्या वतीने‎‎‎‎‎‎‎‎‎‎‎‎‎‎ भाविकांसाठी अनेक सोयी-सुविधा‎ पुरवण्यात आल्या.‎ अखेर बुधवारी या उत्सवाची सांगता‎ झाली. उत्सवासाठी आलेले भाविक‎ आता परतू लागले आहेत.‎

भाविकच झाले स्वयंसेवक‎
उत्सवानिमित्त भाविकांना राहण्यासाठी‎ तात्पुरते तंबू, स्वछतागृहे उभारली होती.‎ पिण्याचे पाणी, आरोग्य सुविधेसह‎ महाप्रसादाची सोय केली होती.‎ टेकडीच्या पायथ्याशी अल्पदरात‎ उपहारगृहे, प्रसाद, फोटो व पुस्तकांची‎ असंख्य दुकाने थाटली गेली होती. या‎ उत्सवाची वैशिष्ट्य म्हणजे जवळपास‎ सर्वच कामे भाविक स्वयंसेवक होऊन‎ करीत होते.‎