अमरतिथी उत्सव:आम्ही जातो आमच्या गावा, आता आपली भेट पुढच्या वर्षी...‎

मागील तीन दिवसांपासून‎ भाविकांच्या गर्दीने गजबजलेली‎ अवतार मेहरबाबांची समाधी टेकडी‎ आज सुनी सुनी झाली. तीन‎ दिवसांच्या उत्सवानंतर राहिलेले‎ भाविक व स्वयंसेवक गावच्या‎ परतीच्या वाटेवर लागले आहेत.‎ एकमेकांना ‘जय बाबा’, ‘जय मेहेर’‎ म्हणत पुढील वर्षी अमरतिथीला‎ भेटण्याचे आश्वासन देत जगातील‎ व राज्यातून आलेले भाविक‎ परतल्याने मेहेरबाबांची समाधी‎ टेकडीवर शांतता पसरली आहे.‎ नगर-दौंड रस्ता ओलांडून‎ टेकडीवरच्या समाधीकडे निघालं,‎ की दोन्ही बाजूंनी वडाची झाडं‎ भाविकांचे स्वागत करतात.‎

वाहनांसाठी शेजारीच लहानसा‎ घाटरस्ता आहे. पहिल्या महायुद्धात‎ लष्करी छावणीसाठी बांधलेल्या‎ पाण्याच्या टाकीचा उपयोग‎ मेहेरबाबांना प्रारंभी वास्तव्यासाठी‎ केला होता. आता तिथं बाबांनी‎ वापरलेल्या वस्तूंचे संग्रहालय‎ उभारले आहे. शेजारील खोलीत‎ ग्रंथालय आणि वरच्या मजल्यावर‎ मेहेरबाबांचा जीवनप्रवास उलगडून‎ दाखवणारी फोटो गॅलरी आहे.‎ शेजारी मेहेरबाबांची विश्रांतीची‎ खोली आणि स्वयंपाकघर आहे.‎ आजही ते जसंच्या तसं जपलं आहे.‎ समाधी मंदिराशेजारी असलेल्या‎ छोट्या पत्र्याच्या खोलीत मेहेरबाबा‎ राहत. ती खोलीही अजून जतन‎‎‎‎‎‎‎‎‎‎‎‎‎‎‎‎ केली आहे.‎

देश-विदेशातील मेहेरप्रेमी इथं‎ येतात, पण कुठेही गोंगाट नाही,‎‎‎‎‎‎‎‎‎‎‎‎‎‎‎‎ अस्वच्छता नाही. स्वच्छतेसाठी‎ कर्मचाऱ्यांचा ताफा नाही. सेवेत‎ प्रभुत्व ही मेहेरबाबांची शिकवण‎‎‎‎‎‎‎‎‎‎‎‎‎‎‎‎ अंमलात आणत, प्रत्येक जण येथे‎ सेवाभाव जपत असतो. त्याचे‎ अनुकरण प्रत्येकाने करायला हवे..‎

पाणीटंचाई असतानाही‎ जपली झाडे‎समाधी मंदिराच्या टेकडीवर हजारो‎ झाडं लावली असून, पाणीटंचाई‎ असतानाही ती उत्तमरित्या‎ वाढवली आहेत. टेकडीच्या‎ मागच्या बाजूला असलेलं‎ (भक्तनिवास) तर आंतरराष्ट्रीय‎ दर्जाचं वास्तूशिल्प आहे.‎ मेहेरबाबांच्या आयुष्यातील काही‎ महत्त्वाच्या प्रसंगांची भव्य चित्रं‎ असलेली मेस, शेजारच्या उद्यानात‎ असलेले संगमरवरी शिल्प, तसेच‎ चित्रं काढलेल्या टाइल्सनं‎ सजवलेली भिंत तर पाहत राहावी,‎ अशी आहे.‎