उदबोधन कार्यशाळेचे आयोजन:सक्षम तर्फे मुकबधीर विद्यालयात कार्यशाळा

'अहमदनगर सक्षम'च्या वतीने जानकीबाई आपटे मूकबधिर विद्यालयात पुणे येथील डॉक्टर अविनाश वाच्यासुंदर व त्यांच्या सहकारी रक्षा देशपांडे यांच्या पालकांबरोबर संवाद व उदबोधन कार्यशाळेचे आयोजन करण्यात आले होते. यात पालकांना विविध योजना व कर्णबधीर विद्यार्थ्यांना दिल्या जाणाऱ्या प्रशिक्षणाची माहिती देण्यात आली.

डॉ. वाच्यासुंदर यांनी पालकांना मार्गदर्शन केले. आपल्या पाल्यांकडे अगदी सहा महिन्यापासून लक्ष देणे, त्यांच्याबाबत जागृत राहणे आवश्यक आहे. कर्णबधीर मुलांना बोलते करून त्यांना नॉर्मल शाळेत पाठवणे व अनुभवाप्रमाणे शिक्षण देणे आवश्यक असल्याचे त्यांनी सांगितले. कोकलियर इम्प्लांटची माहिती सांगून त्यासाठी येणाऱ्या खर्चासाठी सरकारी योजनांची माहितीही त्यांनी दिली.

रक्षा देशपांडे यांनी पुणे येथील केंद्रात कर्णबधीरांसाठी व त्यांच्या माता पालकांसाठी देण्यात येणाऱ्या प्रशिक्षणाची माहिती दिली. विद्यार्थ्यांना अनुभवातून कसे शिक्षण दिले जाते, याची सविस्तर माहिती दिली.

पश्चिम महाराष्ट्र प्रांत उपाध्यक्ष श्रीधर बापट यांनी परिचय करून दिला. संध्या कुलकर्णी यांनी 'सक्षम'ची माहिती उपस्थिताना दिली. अहमदनगर सक्षमचे अध्यक्ष डॉ. राजीव चिटगोपीकर यांनी आभार मानले. सूत्रसंचालन संध्या कुलकर्णी यांनी केले. कार्यक्रमास जानकीबाई आपटे मूकबधिर संस्थेच्या अध्यक्ष डॉ. विद्या जोशी, शाळेचे मुख्याध्यापक विजय आरोटे, त्यांचे सहकारी शिक्षक व सक्षमचे कार्यकर्ते अशोक तोरडमल उपस्थित होते.