आई-वडिलांविरुध्द गुन्हा दाखल‎:हळदीच्या कार्यक्रमानंतर अल्पवयीन‎ वधूने प्रियकरासह घेतले विष‎

लग्नाच्या एकदिवस आधी हळदीचा‎ कार्यक्रम आटोपल्यानंतर एका‎ सोळा वर्षीय अल्पवयीन उपवर‎ मुलीने घरुन निघून जात‎ प्रियकरासोबत विषारी औषध प्राशन‎ करून थेट पोलिस स्टेशन गाठले.‎ यावेळी तिने आपले आई-वडील‎ इच्छेविरुद्ध वय कमी असतानाही‎ लग्न लावून देत असल्याचे‎ पोलिसांना सांगितले. मुलीच्या‎ जबाबावरून पोलिसांनी मुलीच्या‎ आई-वडिलांविरुद्ध बालविवाह‎ अधिनियमानुसार गुन्हा दाखल‎ केला आहे.‎ शहरातील एका सोळा वर्षीय‎ मुलीचे शहरातीलच अठरा वर्षीय‎ मुलासोबत प्रेमसंबंध आहेत. हे‎ प्रेमप्रकरण माहित पडल्याने मुलीच्या‎ आई-वडिलांनी मुलीचे लग्न उरकून‎ टाकण्याचा निर्णय घेतला.

त्यांनी‎ रत्नागिरी येथील एका मुलाशी तिचे‎ लग्न ठरवले. लग्नाची तारीख‎ ठरली. लग्न पत्रिकांचे वाटप‎ करण्यात आले. ८ मार्च रोजी उपवर‎ मुलीला हळद लागली.‎ नातेवाइकांच्या उपस्थितीत‎ धूमधडाक्यात हळदीचा कार्यक्रम‎ पार पडला. त्यानंतर मुलीच्या घरी‎ आजच्या लग्नाची तयारी सुरु झाली‎ होती. मात्र हळदीचा कार्यक्रम‎ आटोपल्यानंतर उपवर मुलीने घर‎ सोडून प्रियकराची भेट घेतली.‎ त्यानंतर त्या दोघांनी विषारी औषध‎ प्राशन करून थेट शहर पोलिस‎ स्टेशन गाठले. पोलिसांनी लगेच‎ दोघांनाही येथील सामान्य‎ रुग्णालयात उपचारार्थ दाखल केले.‎ सध्या त्यांच्यावर उपचार सुरु‎ आहेत. यावेळी पोलिसांनी मुलीच्या‎ जबाबवरून, मुलीने आपले‎ आई-वडील बळजबरीने कमी वय‎ असतानाही लग्न लावून देत‎ असल्याचे सांगितले. मुलीच्या‎ जबाबावरून पोलिसांनी तिच्या‎ आई-वडीलांविरुध्द गुन्हा दाखल‎ केला आहे.‎