आंदोलन:महापुरुषांचा अवमान : वाचाळवीरांना लगाम घालण्यासाठी केळवद ग्रामस्थांचे आंदोलन

भाजप नेते चंद्रकांत पाटील यांनी महापुरुषांनी भीक मागून शाळा उभारल्या या वक्तव्याचा राज्यात ठिकठिकाणी निषेध करण्यात आला. चिखली तालुक्यातील केळवद या गावाने तीव्र निषेध केला. रविवारी गावातील लहान बालकांनी त्यांच्या प्रतिमेवर लघुशंका करत त्यांच्या वक्तव्याचा निषेध व्यक्त केला.

महात्मा फुले, बाबासाहेब आंबेडकर, कर्मवीर भाऊराव पाटील या महामानवाबद्धलच्या लज्जास्पद विधानाने जिल्ह्यात संतापाची लाट उसळली. या पार्श्वभूमीवर केळवदकरांनी बस स्थानक चौकात सकाळी मंत्री पाटील यांच्या प्रतिमेवर मुत्राभिषेक आंदोलन करून प्रचंड नारेबाजी केली.

या आंदोलनात गणेश निकम केळवदकर, नारायण वाणी, नंदूअप्पा बोरबळे, बाजीराव उमाळे, राम हिंगे, गोपाळ वाघमारे, धनु पाटील, विजय ठेंग, अशोक मोहिते, गोपाळ भोसले, विरु यंगड, भगवान अप्पा राजमाने, राजू ठेंग, किसना गवते, भारत पवार यासह आदी गावकरी या आंदोलनात सहभागी झाले होते.

हा तर सत्तेचा उन्माद : गणेश निकम
आंदोलनकर्त्यांनी तीव्र शब्दात आपल्या भावना व्यक्त केल्या. भाजपच्या नेत्यांना सत्तेचा माज चढला आहे. यामुळे ते महापुरुषांचा ठरवून केल्याप्रमाणे अपमान करत असल्याचा आरोप यावेळी आंदोलनकर्त्यांनी केला. त्यांनी आता तरी भानावर यावे, असे आवाहन आंदोलनकर्त्यांनी केले. महामानवांचा अपमान करणाऱ्यांचा प्रतिबंध करण्यासाठी कडक कायदा तयार करण्याची मागणी गणेश निकम केळवदकर यांनी व्यक्त केली.