जयंती‎ महोत्सव:भारत विद्यालयात दुमदुमला‎ "माँ तुझे सलाम''चा स्वर‎

भारत विद्यालयाच्या संस्थापिका तथा‎ कलाप्रेमी मुख्याध्यापिका स्व.‎ शशिकलाताई आगाशे यांच्या जयंती‎ महोत्सवानिमित्त भारत विद्यालय‎ सिनेसृष्टीतील आणि लोककलेतील‎ अनेक कलाकारांच्या मांदियाळीने नटले‎ होते. प्रथम सत्रामध्ये पुरस्कारांचे वाटप‎ झाल्यानंतर उपस्थित मान्यवरांनी सुमधुर‎ गीतांचा कार्यक्रम सादर करीत उपस्थित‎ श्रोत्यांची मने जिंकली.‎ फत्तेशिकस्त, शेर शिवराय,‎ पावनखिंड या गाजलेल्या चित्रपटांचे‎ संगीत दिग्दर्शक असलेले देवदत्त मनीषा‎ बाजी, त्यांचे सहाय्यक आणि उत्तम‎ गझल गायक, गिटार वादक सृजन‎ कुलकर्णी यांनी विद्यार्थ्यांचा उत्साह‎ वाढवणारे आशाएँ हे गीत गाऊन‎ कार्यक्रमाची सुरूवात केली.

त्यासोबतच‎ मुख्य गायिका व सध्या गाजत‎ असलेल्या वेड या चित्रपटातील मुख्य‎ पार्श्वगायिका निधी हेगडे यांनी आपल्या‎ गोड आवाजात गीतांनी वातावरण‎ प्रफुल्लित केले. संस्था सचिव तथा‎ गायक अंगद आगाशे यांनी स्वता‎ लिहिलेले आणि संगीतबद्ध केलेले गीत‎ सादर करून रसिकांची मने जिंकली.‎ कार्यक्रमाचे मुख्य आकर्षण असणारे व‎ सुमारे चाळीस वाद्य लीलया वाजवणारे‎ नागेश भोसेकर यांनी आपल्या‎ तबल्यातील कौशल्याने उपस्थितांना‎ स्तिमित केले.

यावेळी त्यांनी‎ आफ्रिकेतून आणलेल्या कोहाम या‎ वाद्याचा परिचय उपस्थितांना करून‎ दिला. त्यानंतर त्यांनी तबला सोडून इतर‎ वाद्येही वाजवून दाखवली. यावेळी‎ भारत विद्यालयाचा माजी विद्यार्थी‎ असलेल्या चेतन पाटील यांनी तबल्यावर‎ साथ दिली. यावेळी उपस्थित‎ कलावंतांनी उत्तरोत्तर रंगत जाणाऱ्या या‎ गीतांची सांगता विद्यार्थ्यांच्या सोबत वंदे‎ मातरम आणि माँ तुझे सलाम या गीताने‎ करून भारत विद्यालयात पुन्हा येण्याचे‎ व हा ऋणानुबंध असाच दृढ करण्याचे‎ आश्वासन दिले.‎