आ. ॲड.आकाश फुंडकर यांची माहिती‎:खामगाव एमआयडीसीचे‎ विस्तारीकरण लवकरच‎

खामगाव येथील एमआयडीसीचा‎ विस्तार करताना जिगाव प्रकल्पाच्या‎ विविध कारणांसाठी राखीव जमिनीचे‎ ३२ गट तसेच त्या परिसरालगतच‎ अकृषक भूखंडामध्ये रुपांतरीत‎ झालेले १५ गट हे खोडा ठरत आहे. ते‎ गट वगळून इतर गटातील १८५.४५‎ हेक्टर जमीन संपादनासाठी पुढील‎ प्रक्रिया लवकरच सुरू केली जाणार‎ आहे. याबाबत उद्योग मंत्री उदय सामंत‎ यांच्या आदेशानुसार गुरुवारी‎ मंत्रालयात झालेल्या बैठकीत निर्णय‎ झाला.‎ जिल्ह्यासाठी अत्यंत महत्त्वाची‎ असलेली खामगाव औद्योगिक‎ महामंडळ क्षेत्र विस्तारीकरणासाठी‎ मागील काही वर्षापासून प्रक्रिया सुरू‎ झाली आहे.

त्यासाठी २५४.४६ चा‎ प्रस्ताव तयार झाला असून २०१६ मध्ये‎ त्यासाठी प्रकरण तयार झाले. त्यानंतर‎ भूसंपादनासाठी खामगाव येथील‎ उपविभागीय अधिकारी यांच्याकडे‎ प्रकरण देण्यात आले.‎ भूसंपादनासाठी लागणारा निधी तसेच‎ इतरही बाबीसाठी प्रकरण आतापर्यंत‎ प्रलंबित आहे. जिगाव प्रकल्पासाठी‎ जमिनीवरील आरक्षण काढण्याबाबत‎ मंत्री महोदयांनी आदेश दिले असुन‎ जमिनीवरील आरक्षण हटवण्याची‎ प्रक्रिया प्रशासनाकडून पूर्ण झाल्यानंतर‎ लवकरच संबंधित शेतकऱ्याकडून‎ सरळ खरेदीने भूसंपादन केली जाणार‎ आहे. ती प्रक्रिया वेगाने पूर्ण‎ करण्यासाठी शासनाकडे पाठपुरावा‎ सुरू आहे, अशी माहिती आमदार‎ ॲड. आकाश फुंडकर यांनी दिली.‎