दुर्लक्ष:अतिक्रमण काढण्यासाठी चार दिवसांपासून उपोषण सुरूच, जिल्हा प्रशासनाचे दुर्लक्ष

जाफ्राबाद चिखली रोडवरील राजे संभाजी कमानी जवळील नागरिकांच्या जीवितास धोका निर्माण करणारे अतिक्रमण हटवण्यात यावे, या मागणीसाठी संभाजीनगर चिखली येथील संजोग हिवाळे यांनी ५ डिसेंबरपासून जिल्हाधिकारी कार्यालयासमोर उपोषणास सुरूवात केली आहे.गुरुवारी त्यांच्या उपोषणाचा चवथा दिवस होता. परंतु अद्यापही प्रशासनाचे त्यांच्या उपोषणाची दखल घेतली नाही. त्यामुळे सर्वत्र नाराजीचा सूर उमटत आहे.

जाफ्राबाद चिखली रोडवरील राजे संभाजी कमानीजवळ अनेकांनी टपऱ्या टाकून अतिक्रमण केले आहे. या अतिक्रमणांमुळे अपघात होऊन नागरिकांच्या जीवितास धोका निर्माण झाला आहे. यापूर्वी या रस्त्यावर अपघाताच्या अनेक घटना घडल्या आहेत. कित्येकांचा बळी गेला असून कित्येकांना अपंगत्व आले आहे. त्यामुळे भविष्यात अपघात होऊ नये, यासाठी चिखली जाफ्राबाद रोडवरील राजे संभाजी कमानीजवळ असलेले अतिक्रमण काढणे गरजेचे आहे. या अतिक्रमणांबाबत ७ ऑक्टोबर तसेच १४ व २३ नोव्हेंबर रोजी तक्रार देण्यात आली होती. परंतु अद्यापही या तक्रारीची दखल घेण्यात आली नाही. त्यामुळे या मार्गावरील अपघाताला आळा घालण्यासाठी चिखली-जाफ्राबाद रोडवरील अतिक्रमण हटवण्यात यावे, या मागणीसाठी संभाजी नगर, चिखली येथील संजोग हिवाळे यांनी जिल्हाधिकारी कार्यालयासमोर उपोषणास सुरूवात केली आहे. आज त्यांच्या उपोषणाचा चवथा दिवस उजाडला आहे. परंतु अद्यापही प्रशासनाचे त्यांच्या उपोषणाची दखल घेतली नाही.