गजानन मापारी:विश्रामगृहातील वीज जोडणी‎ कामाची चौकशी करा : मापारी‎

पर्यटकांसाठी सार्वजनिक बांधकाम विभागाने‎ एक कोटी ७१ लाख रुपये खर्चून बांधलेल्या‎ नवीन विश्रामगृहातील विद्युत जोडणीचे काम‎ अधिकारी आणि कंत्राटदाराने अंदाज‎ पत्रकाप्रमाणे न करता निकृष्ट दर्जाचे साहित्य‎ वापरून केले आहे. त्यामुळे क्वालिटी कंट्रोलद्वारे‎ चौकशी करून ती पूर्ण होईपर्यंत कामाचे देयक‎ अदा करण्यात येऊ नये. अन्यथा‎ बाळासाहेबांच्या शिवसेनेच्या वतीने तीव्र‎ आंदोलन करण्यात येईल, असा इशारा‎ जिल्हाप्रमुख प्रा. बळीराम मापारी यांनी शुक्रवार,‎ ३ फेब्रुवारी रोजी पत्रकार परिषदेत दिला.‎

लोणार हे जागतिक दर्जाचे पर्यटनस्थळ‎ असून, हे पर्यटनदृष्ट्या विकसित होऊन येथे‎ येणाऱ्या पर्यटकांना उच्च प्रतीच्या सुविधा‎ मिळण्यासाठी शासन कोट्यवधी रुपये खर्च‎ करत आहे. परंतु, संबंधित विभागाचे अधिकारी‎ व कंत्राटदाराच्या संगनमताने निधीतून निकृष्ट‎ दर्जाची कामे केली जात आहेत. शासनाने मंजूर‎ केलेल्या नवीन विश्रामगृहाचे बांधकाम पूर्ण झाले‎ आहे. त्या बांधकामात विद्युत जोडणीसह‎ अद्ययावत उपकरणे बसवली आहेत.

हे काम‎ अमरावती विद्युत विभागांतर्गत करण्यात आले.‎ कामात वापरलेले साहित्य अंदाज पत्रकाप्रमाणे‎ नसून अत्यंत निकृष्ट प्रतीचे आहे. जोडणी‎ करताना हलक्या प्रतीचा वायर वापरण्यात‎ आला. बटन, स्विच बोर्ड, पंखे हेसुद्धा हलक्या‎ प्रतीचे आहेत. अमरावती विद्युत विभागाचे‎ उपविभागीय अधिकारी गौरकर यांनी त्यांच्या‎ मर्जीतील कंत्राटदाराला हे काम दिले. कंत्राटदार‎ व अधिकारी यांच्या संगनमताने निकृष्ट साहित्य‎ वापरून विद्युत जोडणीचे काम केले आहे, असा‎ आरोप मापारी यांनी केला.‎ या संपूर्ण कामाची क्वालिटी कंट्रोलद्वारे‎ चौकशी करावी.

तोपर्यंत या कामाचे देयक‎ कंत्राटदाराला देऊ नये, तसेच या कामाचे‎ उद‌्घाटन करू नये. उद‌्घाटन करण्याचा प्रयत्न‎ केल्यास शिवसेनेकडून तो कार्यक्रम उधळला‎ जाईल, असा इशारा यावेळी प्रा. बळीराम‎ मापारी, तालुकाप्रमुख भगवान सुलताने, युवा‎ सेना तालुकाप्रमुख गजानन मापारी यांनी दिला.‎ या वेळी नगरसेवक डॉ. अनिल मापारी उपस्थित‎ होते. यावेळी निवासी नायब तहसीलदार‎ ज्योत्स्ना परुळीकर शेतीच्या वादासंदर्भात‎ शेतकऱ्यांना वेठीस धरून आर्थिक पिळवणूक‎ करत असल्याचा आरोप प्रा. मापारी यांनी केला.‎ त्यांच्या सर्व कामांची विभागीय चौकशी करून‎ दंडात्मक कारवाई करावी, अशी मागणी केली.‎