संवाद:अधिकाऱ्यांसह कर्मचाऱ्यांनी‎ बँकेला पुनर्वैभव मिळवून दिले

बँकेच्या संक्रमणाच्या काळात अधिकारी‎ व कर्माचाऱ्यांनी रात्रीचा दिवस व रक्ताचे‎ पाणी करून बँकेला पुनर्वैभव प्राप्त करून‎ दिले. माझ्या दहा वर्षाच्या अध्यक्षीय‎ कार्यकाळात आपण सर्वांनी जी मेहनत‎ घेतली, त्यामुळे आपण बँकेची प्रगती‎ करू शकलो, असे प्रतिपादन बँकेचे‎ अध्यक्ष आशिष चौबीसा यांनी केले.‎ येथील खामगाव अर्बन बँकेच्या‎ कर्मचारी संघटनेचे द्विवार्षिक दोन‎ दिवसीय संमेलन आयोजित केले होते.‎ त्यावेळी ते अध्यक्षस्थानावरून बोलत‎ होते. याप्रसंगी बँकेच्या ३२ शाखेतील‎ कर्मचारी व अधिकारी उपस्थित होते.‎

यावेळी संमेलनाचे उद्घाटक म्हणून रा.‎ स्व. संघाचे जिल्हा संघचालक‎ बाळासाहेब काळे होते. तर प्रमुख पाहुणे‎ म्हणून गजानन गटलेवार नागपूर, आ.‎ अ‍ॅड. आकाश फुंडकर, रवी सहस्त्रबुद्धे,‎ नागपूर कार्याध्यक्ष, सुधीर कुळकर्णी,‎ महादेव भोजने सचिव जे. व्ही. मेहता‎ हायस्कुल, चंद्रकांत जोशी, गिरीश‎ देशपांडे, कृपालसिंग पवार यांची‎ उपस्थिती होती. कार्यक्रमाची सुरुवात‎ भारत माता व दत्तोपंत ठेंगडी यांच्या‎‎‎‎‎‎‎‎‎‎ प्रतिमेचे पूजन व दीपप्रज्वलनाने करण्यात‎ आली. प्रास्ताविक संघटनेचे सचिव‎ संजीव राऊत यांनी केले. त्यानंतर जिल्हा‎ संघचालक बाळासाहेब काळे,‎ महादेवराव भोजने, अ‍ॅड. आकाश‎ फुंडकर, रवी सहस्त्रबुद्धे, बँकेचे मुख्य‎ कार्यकारी अधिकारी सुधीर कुळकर्णी‎ यांनी आपले विचार व्यक्त केले. चौबीसा‎ म्हणाले, की संचालक मंडळाने मागील‎ दहा वर्षात कर्मचारी वर्गासाठी मनापासून‎ सहानुभूतीपूर्वक विचार करून, जास्तीत‎ जास्त कर्मचारी वर्गाच्या हितांचे निर्णय‎ घेतले आहेत.

त्यामध्ये वेतन वाढ असो‎ की, गृह कर्जाची मर्यादा व माफक‎ व्याजदर, अगदी कर्मचारी वर्गाच्या‎ आरोग्याची काळजी असो, बढती‎ प्रक्रिया असो, आपण सर्वांचे कौतुकही‎ करण्यात संकोच केला नाही. बँकेची‎‎‎‎‎‎‎‎‎‎ प्रगती हेच ध्येय डोळ्यापुढे ठेवून प्रगतीची‎ वाटचाल कायम राहील, अशी अपेक्षा‎ त्यांनी व्यक्त केली. दुसऱ्या सत्रात बँकेचे‎ सेवानिवृत्त कर्मचाऱ्यांचा शाल व श्रीफळ‎ देऊन सत्कार करण्यात आला. त्यानंतर‎ भारतीय मजदूर संघाचे विदर्भ प्रदेश‎ महामंत्री गजानन गटलेवार यांनी भारतीय‎ मजदूर संघाच्या कार्यानिमित्त अनेक‎ संघटना व संचालक मंडळ पाहिले. परंतु‎ त्यांच्यामध्ये एवढा एकोपा बघावयास‎ मिळाला नाही. बँकेच्या अध्यक्षांनी‎ आपल्या भाषणातून कर्मचारी हिताचे‎ निर्णय तसेच कर्मचारी वर्गाचे कौतुक‎ आतापर्यंत कुठेही ऐकावयास मिळाले‎ नसल्याचे त्यांनी सांगितले. सचिव प्रमोद‎ कस्तुरे यांनी आभार मानले.‎ कार्यक्रमासाठी प्रमोद कस्तुरे व त्यांचे‎ सहकाऱ्यांनी परिश्रम घेतले.‎

बँकेची नूतन कार्यकारिणी जाहीर‎ गटलेवार यांनी नूतन कार्यकारिणी जाहीर केली. त्यामध्ये अध्यक्षपदी पराग देशमुख,‎ तर कार्याध्यक्षपदी अजय सराफ यांची, सचिवपदी प्रमोद कस्तुरे यांची निवड करण्यात‎ आली. तसेच उपाध्यक्षपदी राजू जुनारे, राकेश शर्मा, प्रदीप चोंदे, सुधीर कुळकर्णी,‎ महिला प्रतिनिधी प्रीतिका बोंडे, संघटक म्हणून अभय सावदेकर बुलडाणा विभाग व‎ दीपक बांबल यांची अमरावती विभाग म्हणून निवड केली. तर सदस्य सल्लागार म्हणून‎ अधिकारी व कर्मचाऱ्यांच्या जंबो कार्यकारिणीला मान्यता देण्यात आली.‎