सुविधा:पाच कोटींच्या रस्त्याच्या कामांना प्रशासकीय मंजुरी ; एका रस्त्याचे करण्यात येणार काँक्रिटीकरण

शहरातील सहा प्रमुख रस्त्यांचे डांबरीकरण, काँक्रिटीकरणासाठी पाच कोटींच्या कामांना प्रशासकीय मंजुरी मिळाली या कामांच्या निविदा प्रक्रिया पूर्ण झाल्याने पुढील आठवड्यात या सहाही रस्त्याच्या कामास प्रारंभ होईल.

शहरातील अग्रसेन चौक ते दामले चौक-मराठा मंगल कार्यालय ते मालधक्का या रस्त्याचे डांबरीकरण हाेणार आहे. यासाठी एक कोटींंचा निधी मंजूर झाला. दामले चौक ते फतेह चौक या रस्त्याचेही डांबरीकरण केले जाणार आहे. यासाठी एक कोटी मंजूर केले आहे. गोरक्षण रोडवरील एमएसईबी कार्यालय ते सिंधी कॅम्प रोड या मार्गाचे डांबरीकरण केले जाणार असून, या रस्त्याच्या कामासाठी १ कोटी मंजूर केले आहेत. शहरातील मध्यवर्ती भागातील पंचायत समिती कार्यालय चौक ते वसंत टॉकीज ते शहर कोतवाली या मार्गाच्या डांबरीकरणासाठी एक कोटीे मंजूर झाले. गोरक्षण मार्गावरील सिमेंट रस्ता ते साई मंदिर ते आझाद कॉलनीपर्यंतच्या मार्गाचे डांबरीकरण केले जाणार आहे. या रस्त्याच्या कामासाठी ३० लाख मंजूर केले आहेत.

पाच रस्त्याच्या डांबरीकरणासह जुने शहरातील सुविधा मेडीकल ते काळा मारोती मंदिर ते शंकर साऊंड सर्व्हिस (लोखंडी पुलाजवळ) या रस्त्याचे काँक्रिटीकरण केले जाणार आहे. या काँक्रिटीकरणासाठी ७० लाख खर्च केले जाणार आहे. शहरातील या सहा महत्वपूर्ण मार्गाच्या दुरुस्तीसाठी नागरी सेवा व सुविधा पुरवण्यासाठीच्या निधीतून आमदार गोवर्धन शर्मा यांनी पाच कोटी रुपयांचा निधी शासनाकडून मंजूर करुन आणला होता.

या सर्व कामांना प्रशासकीय मंजुरी मिळाली आहे. महापालिकेने यापूर्वीच या रस्त्याच्या कामांची निविदा प्रक्रिया राबवल्याने या सर्व रस्त्याच्या कामांना पुढील आठवड्यात प्रारंभ करण्यात येईल. या रस्त्याची कामे झाल्यानंतर नागरिकांना सुविधा उपलब्ध होईल. विशेषत: एमएसईबी कार्यालय ते सिंधी कॅम्प या महत्वपूर्ण दोन मार्गाना जोडणाऱ्या रस्त्याची चाळणी झाली आहे. रस्त्याचे काम पूर्ण झाल्या नंतर गोरक्षण मार्गावरुन सिंधी कॅम्पला जाणे-येणे करणे सोयीचे होणार आहे.