रचला इतिहास:अकोल्यातील साठीच्या दोघींची ‘एव्हरेस्ट’ बेस कॅम्पवर यशस्वी चढाई, एकाच कुटुंबातील तिघांनी सर केले शिखर

अकोला‎ येथील डॉ. अंजली राजेंद्र सोनोने‎ आणि सुरेखा दिलीप सोनोने या‎ एकाच कुटुंबातील दोन साठीतील‎ महिलांनी जगातील अतिशय‎ खडतर, धोकादायक अशा‎ ‘एव्हरेस्ट बेस कॅम्प’ची‎ गिर्यारोहणाची खडतर मोहीम ३ मे‎ रोजी यशस्वीरित्या पूर्ण करून‎ अकोल्याच्या गिर्यारोहण मोहिमेत‎ एक नवा इतिहास रचला.‎

दोघींसोबत डॉ. राजेंद्र सोनोने‎ यांनीसुद्धा या गिर्यारोहणाच्या‎ मोहिमेत भाग घेतल्याने एकाच‎ कुटुंबातील तिघांनी एव्हरेस्ट बेस‎ कॅम्प सर करण्याची ही‎ अकोलेकरांसाठी प्रथमच वेळ‎ आहे.

ऐतिहासिक क्षणात केले सहभागी

विशेष म्हणजे, एव्हरेस्ट बेस‎ कॅम्प सर करतानाचा प्रसंग त्यांनी‎ फेसबुकवर लाइव्ह दाखवून सर्व‎ मित्रमंडळींना ह्या ऐतिहासिक‎ क्षणाच्या आनंदात सहभागी केले.‎ या या दोघींनी ही मोहीम २६‎ एप्रिल रोजी लुक्ला ह्या नेपाळमधील‎ हिमालयाच्या अत्यंत दुर्गम‎ भागातील गावातून सुरू केली होती.‎ लुक्ला, फाकडींग, नामचे बजार,‎ तेंगबोचे, देबोचे, फेरीचे, दिंगबोचे,‎ लोबुचे, गोरखशेप, काला पत्थर‎ असे खडतर गिर्यारोहण मजल‎ दरमजल करीत ३ मे रोजी एव्हरेस्ट‎ बेस कॅम्पला ही त्रयी यशस्वीरीत्या‎ पोहोचली.

चहोबाजूंनी बर्फच बर्फ

एव्हरेस्ट बेस कॅम्प हा‎ समुद्रसपाटीपासून ५३६४ मीटर‎ एवढ्या उंचीवर आहे.‎ जेथे वर्षभर चोहोबाजूंनी बर्फच‎ बर्फ असून उणे २० डिग्री सेल्सिअस ‎तापमान असते. पण न डगमगता, ‎ ‎ हिमतीने त्यांनी प्रसंगी सतत ‎कोसळणाऱ्या पावसात आणि सतत ‎होणाऱ्या हिमवर्षावात, उणे २० डिग्री ‎तापमानातही आपली मोहिम ८‎ दिवसांत यशस्वीरित्या फत्ते केली‎ आणि एव्हरेस्ट बेस कॅम्प वर तिरंगा ‎मोठ्या दिमाखात फडकवला.‎

पाठीवर १० ते १५ किलोचे ओझे‎ घेवून दररोज १० ते १२ तास हिमालय ‎चढत जाण्याचे दिव्य या तिघांनी ‎वयाच्या साठीत असताना करून‎ तरूण पिढीला एक मोठा आदर्श‎ घालून दिला. विशेष बाब म्हणजे ही‎ मोहीम त्यांनी स्वतःहून आखली.‎

आयुष्यातला पहिला ट्रेक

विशेष म्हणजे डॉ. अंजली आणि‎ सुरेखा यांचा हा आयुष्यातील पहिला‎ ट्रेक असूनसुद्धा त्यांनी दृढ निश्चयाने‎ तो यशस्वी रित्या पूर्ण केला. डॉ.‎ राजेंद्र सोनोने हे अकोला जिल्ह्यातील‎ पहिले फक्त आयर्न मॅनच नसुन‎ एव्हरेस्ट बेस कॅम्प पेक्षा ३०० मीटर‎ अधिक उंचावर असलेल्या लेह‎ येथील खरदुंगला पास सायकलने सर‎ करणारे पहिले सायकलस्वार आहेत.‎ ‎‎