गुन्हा दाखल:धक्का लागला म्हणून मद्यपीने काचेचा ग्लास डोक्यात मारला

जुने शहर पोलिस ठाण्याच्या हद्दीतील रोहीत बारमध्ये एका मद्यपीने धक्का लागल्याच्या कारणावरून दुसऱ्याच्या डोक्यात काचेचा ग्लास मारून जखमी केले. या प्रकरणी पोलिसांनी गुन्हा दाखल केला आहे. मो. अक्तर मो. सफदर वय ३५ रा. सोनटक्के प्लॉट, असे जखमी युवकाचे नाव आहे. मो. अक्तर हे त्यांचा मित्र रोहीत बारचे मालक रोहीत भगत यांच्याकडे पैसे घेण्यासाठी शनिवारी १० डिसेंबर रोजी रात्री १० वाजताच्या सुमारास गेले होते.

त्यांनी रोहीत भगत यांच्याकडून चार हजार रूपये उसने घेतले. त्यानंतर ते किचनमध्ये रोहित भगत यांच्याशी बोलत उभे असताना तेथे एक मद्यपी आला.

त्या मद्दपीला मो. अक्तरचा धक्का लागला. त्यानंतर ‘तुने मला धक्का का मारला’ म्हणून शिवीगाळ केली व किचनमध्ये असलेला काचेचा ग्लास मारला. तो ग्लास कानाजवळ लागल्याने रक्त येवून मो. अक्तर जखमी झाला. त्या मद्दपीचे नाव माहित नसून, आपण त्यास चेहऱ्याने ओळखतो, असे बयान मो. अक्तरने पोलिसांना दिले. पोलिसांनी मो. अक्तरच्या तक्रारीवरून गुन्हा दाखल केला आहे.