आदेश:राजकीय परिस्थिती बघता जिल्ह्यात कलम 144 लागू; अप्पर जिल्हाधिकारी प्रा. संजय खडसेंचे आदेश

राज्यातील राजकीय परिस्थिती बघता राजकीयदृष्ट्या संवेदनशील असलेल्या अकोला जिल्ह्यात कलम १४४ लागू करण्यात आले आहे. तर आंदोलने, उपोषण, मोर्चे आणि रॅली काढण्यापूर्वी पोलिस विभागाची परवानगी घेणे बंधनकारक करण्यात आले आहे. दरम्यान यासंबंधीचे आदेश अप्पर जिल्हाधिकारी प्रा. संजय खडसे यांनी मंगळवारी २८ जूनला दिले.

शिवसेनेचे बंडखोर आमदार, मंत्री यांनी वेगळा गट तयार केल्यामुळे निर्माण झालेली राजकीय परिस्थिती बघता समर्थनार्थ आणि विरोधात आंदोलने सुरू झाली आहेत. अशा परिस्थितीत जिल्ह्यात कोणताही कायदा आणि सुव्यवस्थेचा प्रश्न निर्माण होऊ नये म्हणून फौजदारी संहिता १९७३ चे कलम १४४ अन्वये आदेश निर्गमित करण्याबाबत पोलिस अधीक्षकांनी सोमवारी २७ जूनला जिल्हा प्रशासनाकडे विनंती केली होती. या संदर्भात जिल्हा पोलिस अधीक्षकांनी नमूद केलेल्या बाबीचे गांभीर्य लक्षात घेता

जिल्ह्यातील कायदा आणि सुव्यवस्थेच्या दृष्टिकोनातून काहीही अप्रिया घटना घडू नये म्हणून अकोला जिल्ह्यात कलम १४४ लागू करण्यात आली आहे. त्यानुसार पुढील आदेशापर्यंत पोस्टर जाळणे, घोषणाबाजी करणे, स्पिकरवर मोठ्या आवाजात गाणी वाजवणे, आंदोलने, मोर्चे, उपोषण आणि रॅली आदीबाबत पोलिस विभागाकडून परवानगी घेणे बंधनकारक करण्यात आले आहे. दरम्यान या आदेशाचे उल्लंघन करणाऱ्यांवर कलम १४४ नुसार कायदेशीर कारवाई करण्याचा इशारा जिल्हा प्रशासनाच्या वतीने देण्यात आला आहे.