तक्रारींवर कारवाई:पालिकेने दोन दिवस थांबवली अतिक्रमण हटाव मोहीम

शहरातील विविध मार्गावर सुरू असलेल्या अतिक्रमण हटाव मोहिमेला दोन दिवस विश्रांती देण्यात आली आहे. दरम्यान या दोन दिवसात अवैध बांधकाम तसेच प्राप्त तक्रारींवर कारवाई केली जाणार असून, बुधवार ७ डिसेंबरपासून मुख्य मार्गावरील अतिक्रमण हटाव मोहीम नियमित सुरू होईल.

महापालिकेच्या वतीने २१ नोव्हेंबरपासून शहरातील मुख्य मार्गावर टप्प्या-टप्प्याने अतिक्रमण हटाव मोहीम राबवली जात आहे. सोमवारी ५ डिसेंबर रोजी शहर कोतवाली-जयहिंद चौक-किल्ला चौक-पोळा चौक-भांडपुरा चौक या मार्गावर अतिक्रमण हटाव मोहीम राबवली जाणार होती. मात्र सोमवारी गोरक्षण मार्गावरील अनधिकृत इमारत पाडण्याचा निर्णय घेण्यात आला. तसेच अतिक्रमणाच्या आलेल्या अन्य लहान-सहान तक्रारीचा निपटारा करण्यात आल्याने मंगळवार ६ डिसेंबरपर्यंत मुख्य मार्गावरील अतिक्रमण हटाव मोहिमेला विश्रांती देण्यात आली. तर बुधवारी ७ डिसेंबरपासून मुख्य मार्गावरील अतिक्रमण हटाव मोहीम पुन्हा सुरू करण्यात येणार आहे.