महिला दिन विशेष ‎:धावत्या रेल्वेसोबत आत्मविश्वासाची गतीसुद्धा वाढत होती

‎तो दिवस अजूनही आठवतो. २९ जानेवारी २०२२.‎ प्रथमच अकोला ते पूर्णा सेक्शन दरम्यान सहायक‎ लोको पायलट म्हणून रुजू झाले. इंजिन केबिनमध्ये‎ दाखल झाले. गाडी सुटायची वेळ आली. मनात‎ भीती दाटून आली. भोंगा वाजला. तशी हृदयाची‎ धडधड अधिकच वाढली. नेहमीसाठी हे‎ आपल्याला जमेल का, असं क्षणभर वाटलं. या‎ क्षेत्रात येऊन चूक तर केली नाही? असंख्य प्रश्नांनी‎ डोक्यात गर्दी केली. तेवढ्यात ग्रीन सिग्नल‎ मिळाला. गाडी स्टेशनवरून सुटली. तसे झुळझुळ‎ वाऱ्यांसह मनातील प्रश्न हवेत विरले. मालगाडीच्या‎ गतीसोबत आत्मविश्वासाची गती वाढत गेली...‎ जागतिक महिला दिनाच्या औचित्याने वेगावर स्वार‎ झालेल्या एका जिद्दी महिलेविषयी...‎

आज रिक्षापासून, जहाज, विमान, रेल्वे‎ गाड्याही महिला मोठ्या कौशल्याने‎ चालवत आहेत. असंख्य अडचणींवर मात‎ करून शारीरिक, मानसिक बळ एकवटून‎ खंबीरतेने पुरुषप्रधान क्षेत्रात आपला ठसा‎ उमटवत आहेत. अशाच एक आव्हानात्मक‎ क्षेत्रात सुकेशनी वसंत घरडे अकोल्यात‎ काम करते. ती रेल्वे दक्षिण मध्य झोनमधील‎ नांदेड विभागात सहायक लोको पायलट‎ पदावर कार्यरत आहे.‎ सुकेशनी मूळ बडनेराची. आठवीत‎ असताना तिच्या वडिलांचा मृत्यू झाला.‎ घरचे आर्थिक गणित बिघडले. विज्ञान‎ विषयाची आवड असताना सुकेशनीला‎ कला शाखेत प्रवेश घ्यावा लागला. घरी‎ लहान भाऊ आणि आई. वडिलांच्या‎‎‎‎‎‎‎‎‎‎‎ निधनानंतर आईची प्रकृती अस्थिर‎ असायची.

त्यामुळे कुटुंबाची जबाबदारी‎ स्व:च्या खांद्यावर घेणे क्रमप्राप्त होते.‎ बारावीनंतर डी. एड. केले. मात्र,‎ बाजारीकरणाच्या काळात शिक्षिकेची‎ नोकरी मिळवणे अवघड झाले. त्यामुळे‎ सुकेशनीने आयटीआयमध्ये प्रवेश घेतला.‎ रेल्वेमध्ये नोकरी करण्याचे स्वप्न तिने‎ बघितले. रात्रंदिवस अभ्यास केला. स्पर्धा‎ परीक्षा दिल्या. तीन वर्षाच्या अथक‎ परिश्रमाला १५ ऑक्टोबर २०१९ ला यश‎ आले. रेल्वेच्या ग्रुप डी विभागाची परीक्षा‎ तिने उत्तीर्ण केली. पहिली नियुक्ती ट्रॅक‎ व्यवस्थापक म्हणून पनवेलला झाली.‎ त्यानंतर २ ऑक्टोबर २०२१ मध्ये सहायक‎ लोको पायलट म्हणून रेल्वेच्या दक्षिण मध्य‎ विभागात रुजू झाली. सध्या अकोला‎ कार्यालयात सुकेशनी ऑफीस आणि फिल्ड‎ दाेन्ही जबाबदाऱ्या आवश्यकतेनुसार पार‎ पाडते. अकोट-अकोला पॅसेंजर, तिरुपती‎ एक्स्प्रेस, तसेच मालगाडी चालवण्याचा‎ अनुभव तिच्या गाठीशी आहे.‎

लोकांच्या नजरेतील कुतूहल‎
गाडी चालवताना चढावानुसार स्पीड नियंत्रण, ब्रेकचे‎ टायमिंग साधने, प्रवाशांनी चेन ओढल्यास शांततेत‎ परिस्थिती हाताळणे, अशा जबाबदाऱ्या पार पाडाव्या‎ लागतात. ड्रायव्हिंग करताना अचानक एखादी व्यक्ती,‎ प्राणी ट्रेकवर येतो. त्यांना वाचवण्याचा आटोकाट‎ प्रयत्न केला जातो. परंतु एखाद दिवशी ते शक्य होत‎ नाही. तो दिवस आमच्यासाठी तणावाचा ठरतो. सर्व‎ महिला रेल्वे चालक शारीरिक व मानसिक अडचणींना‎ पुढे जाऊन मोठ्या जिद्दीने काम करतात. रेल्वेच्या‎ इंजिन डब्यात महिलेला बघून प्रवाशांच्या डोळ्यात‎ कुतूहल आणि कौतुक एकाच वेळी दाटून येतं. हे‎ समाधान शब्दात वर्णन करता येणार नाही.‎ -सुकेशनी वसंत घरडे, सहायक लोको पायलट,‎ दक्षिण- मध्य झोन, रेल्वे विभाग.‎