तक्रार दाखल:हिंगणी मिर्झापूर शिवारात तुरीच्या गंजीला आग‎

तालुक्यातील हिंगणी मिर्झापूर येथील‎ शेतकरी भरत नवलकर यांनी आपल्या १०‎ एकर कोरडवाहू शेतामध्ये लाखो रुपये‎ खर्च करून तुरीची लागवड केलेली होती.‎ गत दोन-तीन दिवसांपूर्वी तुरीची सोंगणी‎ करून तुरीची गंजी लावलेली होती. मात्र‎ रविवारी दुपारी शेतातील तुरीच्या गंजीला‎ कोणीतरी आग लावली यात तुरीची गंजी‎ जळून राख झाली.‎ या आगीत शेतकरी भरत नवलकर यांचे‎ अंदाजे ४ लाख रुपयांच्या जवळपास‎ नुकसान झाल्याची प्राथमिक माहिती समोर‎ आलेली आहे. सदर आग लागल्याची‎ माहिती गावात पसरताच गावातील‎ नागरिकांनी आग विझविण्याचा प्रयत्न‎ केला मात्र आगीने रौद्ररूप धारण केले‎ होते. दरम्यान दर्यापूर नगरपालिकेच्या‎ अग्निशमन दलाला बोलावले. परंतु तोपर्यंत‎ आगीमध्ये तुरीची गंजी पूर्णतः जळून खाक‎ झाली होती. नवलकार यांनी दर्यापूर पोलिस‎ स्टेशन येथे या संदर्भात तक्रार दाखल केली‎ आहे.‎