तरुणाचा उपचार:प्राणघातक हल्ल्यात गंभीर झालेल्या जखमी तरुणाचा उपचारादरम्यान मृत्यू

फ्रेजरपुरा पोलिस ठाण्याच्या हद्दीतील बेनोडा भागात राहणाऱ्या एका २५ वर्षीय तरुणावर चौघांनी घरात जाऊन चाकूने सपासप वार केले होते. ही घटना शुक्रवारी रात्री घडली होती. यातील जखमी तरुणावर शहरातील खासगी रुग्णालयात उपचार सुरू होते. उपचारादरम्यान या तरुणाचा मंगळवारी (दि.१३) सकाळी मृत्यू झाला. रोहित ऊर्फ नादो विजय भोंगळे (२५) असे उपचार दरम्यान मृत्यू झालेल्या तरुणाचे नाव आहे.

घटनेच्या वेळी हल्लेखोरांनी रोहित सोबतच त्याच्या बहिणीवर सुद्धा हल्ला केला होता. याप्रकरणी पोलिसांनी प्रवीण ऊर्फ पिंटू भीमराव बनसोड (३९), रूपेश भीमराव बनसोड (४२, दोघेही रा. बेनोडा जहागीर), अमोल दिनेशराव जोंधळे (३८, भीमटेकडी) आणि सै. नाजिम सै. सत्तार (३२, राहुलनगर) यांना शनिवारी पहाटेच पोलिसांनी अटक केली आहे. शुक्रवारी रात्री रोहित ऊर्फ नादो हा घराच्या अंगणात उभा असताना प्रवीण बन्सोड, रूपेश बन्सोड आणि अनिल जोंधळे तसेच एक अनोळखी इसम असे चार जण त्याच्या घरात चाकू घेऊन शिरले.

येताना चौघांनी ‘नादो, आता तुला सोडणार नाही, तू आमच्या हाताने मरणार’ असे म्हणून जोरजोराने शिवीगाळ करीत व हातातील चाकू फिरवत येत असताना आजूबाजूचे लोक भीतीने आपापले घरात पळून गेले. त्यावेळी अंगणात असलेल्या नादोवर चौघांनी मिळून चाकूने सपासप वार केलेत. नादोला भोसकत असल्याने त्याची आई व बहीण सोनू मध्ये गेल्या. मात्र, हल्लेखोर थांबले नाहीत. त्यांनी नादोच्या पाठीवर, डोक्यावर, पोटावर चाकूने वार करून त्याला जीवे ठार मारण्याच्या उद्देशाने गंभीर जखमी केले होते.