आपल्या शहरातील ताज्या बातम्या आणि ई-पेपर मिळवा मोफत

डाउनलोड करा

तंटामुक्त समितीच्या अध्यक्षावरील हल्ला प्रकरण:आरोपीला 10 वर्षांची शिक्षा; अवैध दारू पकडून दिल्याच्या रागातून केला होता हल्ला

अमरावती17 दिवसांपूर्वी
  • कॉपी लिंक

माहुली जहागीर पोलिस ठाण्याच्या हद्दीतील ब्राह्मणवाडा गोविंदपूर येथील तंटामुक्त समितीच्या तत्कालीन अध्यक्षावर गावातील एकाने जीवघेणा हल्ला चढविला होता. ही घटना चार वर्षांपूर्वी घडली होती. या प्रकरणात येथील विशेष जिल्हा न्यायालय, अतिरिक्त सत्र न्यायालय एस. एस. अडकर यांच्या न्यायालयाने हल्लेखोराला 10 वर्ष सश्रम कारावासाची शिक्षा सुनावली आहे. न्यायालयाने बुधवारी हा निर्णय दिला.

कसा झाला हल्ला?

विधी सूत्रांनी दिलेल्या माहितीनुसार, संजय अजाबराव तायडे असे शिक्षा झालेल्या आरोपीचे तर नितीन ज्ञानेश्वर भुयार असे तत्कालीन तंटामुक्त समितीच्या जखमी अध्यक्षाचे नाव आहे. 24 ऑगस्ट 2018 ला नितीन भुयार हे शेतातून घरी परत येत असताना गावातच समाज मंदिराजवळ संजय तायडेने नितीन भुयार यांच्यावर कुऱ्हाडीने हल्ला चढविला. नितीन भुयार यांनी घटनेच्या काही दिवसांपुर्वी संजय तायडे याची अवैध दारू पकडून दिली होती. त्याचा राग असल्यामुळे तायडेने हा हल्ला भुयार यांच्यावर चढवला होता. हा हल्ला झाला त्यावेळी आरोपी संजय तायडेसोबत सुधाकर डोमाजी उईके (५०) आणि संजय नारायण खुळे (४०, दोघेही रा. ब्राह्मणवाडा गोविंदपूर) हे सोबत होते.

दोघांची पुराव्याअभावी मुक्तता

दरम्यान हल्ल्यात गंभीर जखमी झालेल्या नितीन भुयार यांना गंगाधर भुयार यांनी अमरावतीत रुग्णालयात दाखल केले होते मात्र भुयार यांची प्रकृती गंभीर असल्यामुळे त्यांना अमरावतीतून नागपूर दाखल केले होते. या प्रकरणात नितीन भुयार यांच्या वडीलांनी माहुली जहागिर पोलिसात तक्रार दाखल केली होती. तक्रारीवरुन पोलिसांनी संजय तायडेसह सुधाकर उईके व संजय खुळे यांच्याविरुध्द प्राणघातक हल्ला केल्याप्रकरणी गुन्हा दाखल केला होता. या प्रकरणाचा तपास पूर्ण करून माहुली पोलिसांनी 22 नोव्हेंबर 2018ला दोषारोपपात्र दाखल केले. प्रकरणाच्या सुनावणीदरम्यान सरकारी पक्षाकडून वकील. दिलीप तिवारी यांनी एकूण दहा साक्षीदारांच्या साक्ष तपासल्या. यावेळी न्यायालयात संजय तायडेविरुध्द गुन्हा सिध्द झाल्यामुळे न्यायालयाने त्याला 10 वर्ष सक्तमजूरी व दहा हजार रुपये दंड, दंड न भरल्यास सहा महिने अतिरिक्त कारावासाची शिक्षा सुनावली. याचवेळी सुधाकर उईके व संजय खुळे या दोघांची पुराव्याअभावी निर्दोष मुक्तता करण्यात आली आहे.

बातम्या आणखी आहेत...