शेतकऱ्याची कोंडी:घरात साठवलेला कापूस आता‎ कमी भावाने विकण्याची वेळ‎, साठवून ठेवलेल्या कापसामुळे जडताहेत त्वचेचे विकार‎

अमरावती जिल्ह्यातील दर्यापूर, अचलपूर, अंजनगाव सुर्जी, भातकुली,‎ चांदूर बाजारसह इतर तालुक्यातही मोठ्या प्रमाणात कापसाचे उत्पादन‎ घेतल्या जाते. या वर्षी कापसाला चांगला भाव मिळणार म्हणून बहुतांश‎ शेतकऱ्यांनी कापूस विक्रीसाठी न काढता दोन ते तीन महिन्यांपासून घरातच‎ त्याची साठवणूक केली आहे.

चांगला भाव मिळाला की, कापूस विक्रीला‎ काढू असे नियोजन केले. मात्र, शासनाने कापसाच्या दराबाबत कुठलीच‎ योग्य ती घोषणा न केल्याने कापूस घरातच पडून असल्याने शेतकरी‎ अडचणीत आला आहे. घरात ठेवलेल्या कापसामुळे अंगाला लाल चट्टे‎ पडून शरीर खाजवत आहे. त्यामुळे नाईलाजाने शेतकऱ्यांना मिळेल त्या‎ भावाने कापूस विक्रीसाठी काढावा लागत आहे.‎

गतवर्षी कापसाच्या भावाने १२ हजार रुपयाचा टप्पा पार केला होता.‎ त्यामुळे या वर्षी सुध्दा कापसाला योग्य दर मिळतील, अशी अपेक्षा‎ शेतकऱ्यांना होती. मात्र कापसाचे भाव वाढले नाही. भाव वाढीच्या प्रतिक्षेत‎ घरात भरून ठेवलेला कापूस त्वचेवर दुष्परिणाम करत आहे. त्वचेवर‎ लालसर ठिपके पडून खाज सुटली आहे.

कापसामुळे हाता पायावर पाठीवर,‎ पोटावर मोठ्या प्रमाणात खाज येत आहे. अचलपूर तालुक्यात इसापूर,‎ काकडा, हरम, टवलार, धामणगाव गढी येथील बहुतांश शेतकऱ्यांचा घरी‎ कापूस पडून आहे. त्यामुळे बहुतांश शेतकरी कवडीमोल भावात कापूस‎ विक्रीला प्राधान्य देत आहे, तर काही शेतकरी मात्र कापूस दरवाढीच्या‎ प्रतिक्षेत असून कापसाच्या संपर्कात येणे टाळत आहे.‎

जागतिक स्तरावर मंदी‎

विदर्भातील शेतकऱ्यांनी दरवाढ‎ होणार म्हणून कापसाची साठवण केली‎ आहे. मात्र जागतिक स्तरावर मंदी‎ असल्याने सध्या कापसाचे दर प्रती‎ क्विंटल ७८०० ते ८००० रुपये आहेत.‎

- दुर्गाशंकर अग्रवाल, व्यापारी‎

बुरशीमुळे खाजेचा त्रास‎ कापसावरील सरकीतील सूक्ष्म ॲस्परजिलस या बुरशीमुळे‎ अंगाला खाज येणे, लालचट्टे पडणे, पुरळ येणे, फोड येणे ही‎ लक्षणे दिसून येतात. त्यामुळे कापसापासून दूर रहावे.‎ नाकाला कापड बांधावे, अंगाला मॉश्चराईज लावावे, थंड‎ बर्फ लावावा, त्रास होत असेल डॉक्टरांशी संपर्क साधावा.‎ -डॉ. राजश्री वाघ, त्वचारोग तज्ज्ञ, परतवाडा‎

चांगला भाव मिळेल‎ म्हणून साठवला होता‎ कापसाला चांगला भाव मिळावा‎ म्हणून घरात कापूस साठवणूक करून‎ ठेवला होता. मात्र काही दिवसांपासून‎ कापसाच्या संपर्कात आल्याने अंगाला‎ खाज सुट असल्यामुळे कापूस‎ विकण्याचा निर्णय घेतला आहे.‎ -शंकर ठाकरे, कापूस उत्पादक‎ शेतकरी, इसापूर‎ साठवून ठेवलेल्या कापसामुळे शेतकऱ्यांना खाजेचा सामना‎ करावा लागत असून, त्यांच्या शरीरावर असे चट्टे पडताहेत.