खळबळ:अंजनगाव सुर्जीत आ. संतोष बांगर यांच्या ताफ्यावर शिवसैनिकांचा हल्लाबोल

शिवसेनेतून बंडखोरी करत शिंदे गटात गेलेले हिंगोलीचे आमदार संतोष बांगर हे रविवारी (२५ सप्टेंबर) अमरावती जिल्ह्यातील अंजनगाव सुर्जी येथील देवनाथ मठातून दर्शन करून निघाले असता शिवसैनिकांनी त्यांची गाडी अडवण्याचा प्रयत्न केला. घोषणाबाजी करत त्यांच्या वाहनावर हल्लाबोल केला. अचानक घडलेल्या या प्रकारामुळे सर्वत्र एकच खळबळ उडाली. ही घटना रविवारी सायंकाळी साडेसहाच्या सुमारास घडली.

रविवारी दुपारी तीन वाजता आ. बांगर येथील देवनाथ मठात दर्शनाकरिता आल्याची कुणकुण तालुक्यातील शिवसैनिकांना लागली. त्यानंतर शहरासह ग्रामीण भागातील शिवसैनिक लाला चौकात गोळा झाले. सायंकाळी साडेसहाच्या सुमारास आ. बांगर यांच्या वाहनांचा ताफा मठाबाहेर पडताच शिवसैनिकांनी त्यांच्या वाहनावर बुक्के मारत घोषणाबाजी केली. या वेळी आ. बांगर यांच्यासोबत असलेल्या अंगरक्षकांनाही काही वेळ काय होत आहे, हे कळले नाही. या घटनेने काही वेळ लाला चौकात एकच खळबळ उडाली होती.