सांस्कृतिक व‎ नैसर्गिक वारसा स्थळांचा आढावा:‘इंटक’ संस्थेच्या सभेमध्ये‎ अमरावती शाखेची स्थापना ‎

भारतीय राष्ट्रीय कला व सांस्कृतिक‎ वारसा संस्था अर्थात इंडियन नॅशनल‎ ट्रस्ट फॉर आर्ट अॅन्ड कल्चरल हेरिटेज‎ (इंटक) ही अशासकीय संस्था‎ ऐतिहासिक वारसा स्थळे, वस्तू,‎ नैसर्गिक, सांस्कृतिक व कलेचा वारसा‎ जतन, संवर्धन व यासाठी कार्यरत संस्था‎ आहे. संस्थेची सभा नुकतीच संत गाडगे‎ बाबा अमरावती विद्यापीठ येथे पार‎ पडली. या प्रसंगी अमरावती शाखेची‎ स्थापनादेखील करण्यात आली.‎ सभेसाठी दिल्ली येथील इंटकचे‎ कार्यकारिणी सदस्य तथा अध्याय‎ सल्लागार समितीचे अध्यक्ष जी. एम.‎ कपूर, कार्यकारी सदस्य अशोकसिंग‎ ठाकूर, दिल्लीचे कार्यकारी सदस्य तथा‎ नागपूर अध्याय निमंत्रक डॉ. मधुरा‎ राठोड, सदस्य मनोज जैन आदी मान्यवर‎ उपस्थित होते.

सभेचे निमंत्रक डॉ. जयंत‎ वडतकर आणि षार वरणगावकर यांनी‎ सर्वप्रथम सर्व उपस्थितांचे स्वागत करून‎ पाहुण्यांचा परिचय दिला. डाॅ. वडतकर‎ यांनी प्रास्ताविकातून अमरावती‎ जिल्ह्यातील ऐतिहासिक, सांस्कृतिक व‎ नैसर्गिक वारसा स्थळांचा आढावा सादर‎ केला. अशोकसिंग ठाकूर यांनी आपल्या‎ मार्गदर्शनातून संस्थेबद्दलची माहिती व‎ संस्थेद्वारे जगभरात सुरू असलेले‎ संवर्धन प्रकल्प याबद्दलची माहिती‎ उपस्थितांना दिली. जी. एम. कपूर यांनी‎ संस्थेच्या स्थापनेपासूनची माहिती देत‎ सदस्यांच्या सहकार्याने आजवर‎ केलेल्या यशस्वी कामाची माहिती देऊन‎ इंटकचे सदस्य हे स्वतः स्वयंसेवक‎ म्हणून कार्य करीत असल्यानेच संस्थेने‎ यश संपादन केल्याची भावना आपल्या‎ मनोगतातून व्यक्त केली.

डॉ. मधुरा‎ राठोड यांनी देशभरात १९० अध्यायांच्या‎ माध्यमातून होत असलेले कार्य व‎ अध्यायाची कार्यप्रणाली तसेच नवीन‎ अध्याय सुरू करण्यासाठीची प्रक्रिया‎ याबाबत माहिती देऊन अमरावती‎ अध्याय सुरू करण्यासाठी‎ अमरावतीकरांनी घेतलेल्या‎ पुढाकाराबद्दल उपस्थितांचे अभिनंदन‎ केले. कार्यक्रमाचे प्रास्ताविक प्रा. डॉ.‎ प्रशांत शिंगवेकर यांनी केले. डॉ. जयंत‎ वडतकर आणि श्री तुषार वरणगावकर‎ यांचेसह किरण मोरे, प्रा. डॉ. विनोद‎ भटकर, प्रा. डॉ. नेहा भटकर, प्रा. डॉ.‎ प्रशांत शिंगवेकर, प्रा. डॉ. अभिजित‎ मेंढे, सतेज केचे, जयंत सोनोने, ‌पंकज‎ बांडाबुचे, प्रदीप पाटील, अंकुश खंडारे,‎ स्नेहल विधळे, तृप्ती भामकर, नीलेश‎ कंचनपुरे, जगदीश गुप्ता, मल्हार‎ पुंडलिक आदी उपस्थित होते.‎