घोषणा करण्यापूर्वी सत्तार यांचा सावध पवित्रा:सत्तारांना फडणवीसांचा धाक? म्हणाले, घोषणा करता येत नाही

सहा महिन्यांत या सरकारने जेवढे पैसे शेतकऱ्यांना दिले, ते याआधी कोणत्याही सरकारने दिले नाही. शेतकऱ्यांना खूप मदत आम्ही करणार आहोत. फक्त घोषणा बाहेर करता येत नाही. लवकरच शेतकऱ्यांना मोठी मदत मिळणार असल्याचे कृषिमंत्री अब्दुल सत्तार यांनी अमरावती येथे सांगितले. परस्पर घोषणा करण्यावरून यापूर्वी मंत्री सत्तारांना उपमुख्यमंत्री देवेंद्र फडणवीसांनी फटकारल्यानंतर आता कोणतीही घोषणा करण्यापूर्वी मंत्री सत्तार सावध पवित्रा घेत असल्याचे पाहायला मिळत आहे.

२८ हजार मेट्रिक टन कांदा खरेदी : सत्तार म्हणाले की, सध्या कांद्याला अत्यल्प भाव मिळत असून शेतकऱ्यांची भावना मला कळतात. याशिवाय कोथिंबिरीच्या हमी भावावरही लक्ष्य आहे. कधी मंदी येते, कधी चांगला दरही मिळतो. भविष्यात ज्या ज्या ठिकाणी मागणी येईल, तिथे कांदा खरेदी केली जाईल. नाफेडद्वारे आतापर्यंत २८ हजार मेट्रिक टन कांदा खरेदी केला असून आणखी कांदा खरेदी करू, असे सत्तार म्हणाले.