धार्मिक‎ विधीला बगल:आईच्या स्मृतिप्रीत्यर्थ 11 मुलींच्या‎ नावे एक लाख रुपयांची मुदतठेव‎

वृद्धापकाळाने आईच्या निधनानंतर धार्मिक‎ विधीला बगल देत, तिची रक्षा शेतातील‎ आंब्याच्या झाडांना विसर्जन करून हीच झाडे‎ आम्हाला आईच्या मायेची सावली व गोड-मधूर‎ फळे चाखायला देतील या भावनेतून शेतकरी‎ मायकर कुटुंबाने आईच्या अस्थी आंब्याच्या‎ रोपट्याखाली शनिवारी विसर्जित केल्या.‎ शिवाय ११ मुलींच्या नावे प्रत्येकी १० हजार‎ याप्रमाणे १ लाख १० हजारांची मुदतठेवही केली ‎.‎ पिंपळगाव (ना.) येथील शेतकरी संघटनेचे‎ कार्यकर्ते सुभाष मायकर, माउली मायकर व‎ कुंडलिक मायकर यांच्या आई किसनाबाई‎ रोहिदास मायकर यांचे मंगळवारी (७ मार्च)‎ निधन झाले. जागतिक महिलादिनी (८ मार्च)‎ सकाळी साडेदहा वाजता त्यांच्यावर‎ अंत्यसंस्कार करण्यात आले. हिंदू धर्मात‎ बहुतांश समाजामध्ये चौदा दिवसांचा दुखवटा‎ पाळून चौदावा झाल्यानंतर कुटुंबीय आपापल्या‎ कामाला लागतात. मात्र एवढे दिवस दुखवटा न‎ पाळता पाच दिवसांचा दुखवटा पाळणार‎ असल्याचे सुभाष मायकर यांनी जाहीर केले.‎ परंपरागत राख सावडल्यानंतर मायकर परिवाराने‎ राख गंगेत न टाकता त्यांच्या स्मरणार्थ वृक्षांना‎ विसर्जित करून व तेराव्यासाठी लागणारा खर्च‎ अकरा मुलींच्या नावे प्रति दहा हजार रुपयांप्रमाणे‎ बँकेत मुदतठेव केली. त्यामुळे त्या मुलींना अठरा‎ वर्षांनंतर प्रत्येकी एक लाख रुपये मिळतील असे‎ सुभाष मायकर यांनी म्हटले.‎