पोलिस कारवाई:इनोव्हा कारसह चार लाख 72 हजारांची अवैध विदेशी दारू जप्त; दोघांविरुद्ध गुन्हे दाखल

वर्धा जिल्ह्यात दारूबंदी असली तरी सीमेवर असलेल्या तिवसा येथून अनेक मार्ग व वेगवेगळ्या साधनांद्वारे नेहमीच देशी-विदेशी दारूची वाहतूक केल्या जाते. गेल्या अनेक दिवसांपासून हा प्रकार सुरू असल्याने तिवसा पोलिसांच्या चमूने इनोव्हा कारसह वर्धेत जाणारा ४ लाख ७२ हजार रुपयांचा अवैध दारू साठा जप्त केला. या प्रकरणी दोघांविरुद्ध गुन्हे दाखल केले आहे.

जसवंतसिंग लहरी सिंग अंधेरेले बावरी व लहरिसिंग मखमल सिंग अंधेरेले बावरी अशी अवैध दारू वाहतुक प्रकरणी गुन्हे दाखल झालेल्या आरोपींची नावे आहेत. हे दोघेही तळेगांव श्यामजी पंत येथील असून, त्यांना पोलिसांनी तिवसा नजीकच्या वणी फाट्यावर अटक केली. पोलिस अधीक्षक अविनाश बारगळ, अप्पर पोलिस अधीक्षक शशिकांत सातव, उपविभागीय पोलिस अधिकारी जितेंद्र जाधव यांचे मार्गदर्शनाखाली सहाय्यक पोलिस निरीक्षक संदीप चव्हाण यांचे नेतृत्वात ही कारवाई करण्यात आली.

अवैधरीत्या विदेशी दारूची वाहतूक होत असल्याची गोपनीय माहिती तिवसा पोलिसांना मिळाली होती. त्याआधारे त्यांनी वणी फाट्यावर सापळा रचून इनोव्हा कारची तपासणी केली असता त्यात ऑफिसर चॉइस २ पेटी, इम्पेरियल ब्ल्यू २ पेटी, स्टेअरिंग, रिझर्व्ह (बी-७) एक पेटी, हेवर्ड ५००० बिअर बॉटल व कॅन प्रत्येकी तीन पेट्या असा एकूण ७२ हजार रुपयांचा विदेशी दारू साठा व ४ लाख रुपये किमतीची कार असा एकूण ४ लाख ७२ हजार रुपयांचा मुद्देमाल जप्त करण्यात आला. यातील आरोपी जसवंतसिंग बावरी व लहरिसिंग बावरी या दोघांवर गुन्हे दाखल करून अटक करण्यात आली.