आपल्या शहरातील ताज्या बातम्या आणि ई-पेपर मिळवा मोफत

डाउनलोड करा

पालखी:माहेरून श्री रुक्मिणीमाता निघाली सासरला ; श्री रूक्मिणीमातेची पालखी पंढरपूरकडे मार्गस्थ

अमरावतीएका महिन्यापूर्वी
  • कॉपी लिंक

विदर्भातील ४२७ वर्षांची प्राचीन परंपरा असलेली श्री रुक्मिणी मातेची पालखी श्रीक्षेत्र कौंडण्यपूर येथून श्रीक्षेत्र पंढरपूरकडे रवाना झाली. राज्याच्या महिला व बालविकास मंत्री तथा जिल्ह्याचे पालकमंत्री ॲड. यशोमती ठाकूर यांनी श्री रुक्मिणीमातेची पालखी खांद्यावर वाहून पंढरपूरच्या दिशेने मार्गस्थ केली. पालखीचा घोडा, डोक्यावर तुळशी वृंदावन घेऊन सहभागी झालेल्या वारकरी महिला, सुशोभित रथ, टाळ-मृदंगाचा निनाद, ‘ज्ञानबा तुकाराम’चा जयघोष अशा उत्साहपूर्ण व भक्तिमय वातावरणात पालखीने मार्गक्रमण सुरू केले. यावेळी भक्तिमय अभंगवाणी व टाळमृदंगाच्या साथीने आसमंत निनादून गेले होते. कोविड साथीमुळे दोन वर्षांचा निर्बंध संपल्यानंतर मुक्त वातावरणात पालखी निघाल्याने वारकऱ्यांमध्ये उत्साह संचारला होता.पालकमंत्री ॲड. ठाकूर यांच्या हस्ते प्रारंभी पालखीचे पूजन झाले. पालकमंत्र्यांनी श्री विठ्ठल व श्री रुक्मिणीमातेचे दर्शन घेतले. त्यानंतर पालकमंत्र्यांनी भक्तांसोबत फुगडी खेळली व पालखी खांद्यावर वाहून पंढरीच्या दिशेने मार्गस्थ केली.श्री कौंडण्यपूर येथील पालखीला मोठी परंपरा आहे. दोन वर्षानंतर पायी वारी निघत असल्याचा मोठा आनंद आहे. रुक्मिणी माता माहेरवरून सासरला निघाली आहे. ‘राज्यात यंदा सर्वत्र चांगला पाऊस होऊ दे. धनधान्य पिकू दे. बळीराजा समृद्ध होऊ दे. सर्वांना चांगले आरोग्य लाभू दे’, अशी प्रार्थना पालकमंत्र्यांनी यावेळी केली. पालखीच्या स्वागतासाठी अमरावती येथे ६ जूनला कार्यक्रम होईल. यावेळी तीन रूग्णवाहिकांचे लोकार्पणही होणार आहे. त्यातील एक रुग्णवाहिका पालखीसमवेत जाणार आहे. डॉक्टरांसह सर्व उपचार सुविधा त्यात उपलब्ध असतील. पालखीसोबत पाण्याच्या टँकरचेही नियोजन करण्याचे जिल्हा प्रशासनाला निर्देश देण्यात आले आहेत, असे पालकमंत्री अॅड. ठाकूर यांनी यावेळी सांगितले. यावेळी ह. भ. प. संजय महाराज ठाकरे, नामदेव अंबाडकर, वसंत डाये यांच्यासह अनेक मान्यवर व भक्तगण उपस्थित होते.

बातम्या आणखी आहेत...