बडनेरा पोलिस हद्दीतील 9 वर्षांपूर्वीचे प्रकरण‎:महिला पोलिसाशी हुज्ज्जत,‎ दोघांना अकरा हजारांचा दंड‎

बडनेरा पोलिस ठाण्यात जाऊन‎ महिला पोलिस अंमलदाराशी‎ हुज्जत घालणाऱ्या दोघांविरुद्ध दोष‎ सिद्ध झाला. त्यामुळे येथील जिल्हा‎ न्यायालय (क्रमांक १) च्या‎ न्यायाधीश आय. ए. शेख नझीर‎ यांच्या न्यायालयाने दोन्ही आरोपींना‎ न्यायालय उठेपर्यंत शिक्षा तसेच‎ प्रत्येकी ११ हजार ५०० रुपयांचा दंड‎ ठोठावला आहे. हा निर्णय‎ न्यायालयाने सोमवारी (दि. १०)‎ दिला.‎ विधी सूत्रांनी दिलेल्या‎ माहितीनुसार, उमेश महादेव मेश्राम‎ (४६) आणि भारतभूषण नानाजी‎ रामटेके (४०, दोघेही रा. बडनेरा)‎ असे शिक्षा झालेल्या आरोपींची नावे‎ आहेत. १८ डिसेंबर २०१४ रोजी‎ बडनेरा पोलिस ठाण्यात उमेश‎ मेश्राम, रामटेके हे एका व्यक्तीला‎ जखमी अवस्थेत घेऊन गेले होते.‎ पोलिसांनी त्या जखमी व्यक्तीला‎ उपचारासाठी रुग्णालयात पाठवले.‎ त्यावेळी आरोपींनी पोलिस ठाण्यात‎ उद्धट वर्तन केले. तसेच स्टेशन‎ डायरी अंमलदार म्हणून पोलिस‎ नाईक जया इंगळे या कार्यरत होत्या.‎

त्यावेळी ठाणेदार व इतर पोलिसांनी‎ आरोपींना गैरवर्तन करु नका, रितसर‎ तक्रार द्या, असे सांगितले मात्र,‎ त्यांनी जया इंगळे यांना शिवीगाळ‎ करुन त्यांना तुमच्यावर केस करेल,‎ अशी धमकी दिली तसेच‎ पोलिसांसोबत हुज्जत घातली. या‎ प्रकरणी इंगळे यांनी तक्रार दिली व‎ दोघांविरुद्ध शासकीय कामात‎ अडथळा निर्माण केल्याप्रकरणी‎ गुन्हा दाखल केला होता. या‎ प्रकरणात पोलिसांनी दोषारोपपत्र‎ दाखल केले. प्रकरणाच्या‎ सुनावणीदरम्यान सरकारी‎ अभियोक्ता अनुप्रिती ढवळे यांनी‎ सात साक्षीदारांच्या साक्ष तपासल्या.‎ यावेळी दोन्ही आरोपिविरुद्ध दोष‎ सिद्ध झाल्यामुळे न्यायालयाने‎ दोघांनाही न्यायालय उठेपर्यंतची‎ शिक्षा तसेच प्रत्येकी ११ हजार ५००‎ रुपयांचा दंड ठोठावला आहे.‎