कारवाई:शहरातील नागरिकांच्या प्रलंबित प्रश्नांसाठी‎ जिल्हाधिकारी कार्यालयासमोर बेमुदत उपोषण‎

शहरातील विविध प्रलंबित प्रश्नांवर‎ सोमवारपासून जिल्हाधिकारी कार्यालय‎ अमरावती येथे जय संविधान संघटनेचे‎ समन्वयक किरण गुडधे यांनी बेमुदत उपोषण‎ सुरु केले आहे. जिल्हा प्रशासनाकडे‎ वेळोवेळी लिखित स्वरुपात निवेदन देऊनही‎ प्रशासन जनतेप्रती संवेदनशील नसल्याचा‎ आरोप गुडधे यांनी यावेळी केला.‎ कोरोना काळात एक्झॉन, महावीर, गेट‎ लाईट, बख्तार, बेस्ट, झेनिथ या खासगी‎ कोविड हॉस्पिटलचे मुख्य लेखा परीक्षक‎ मनपा अमरावती यांच्या पथकाने ऑडिट‎ केले होते. नियमबाह्य पद्धतीने २ हजार ६७५‎ कोविड रुग्णांकडून १ कोटी ३० लाख रुपये‎ जादा घेतल्याचे यातून सिद्ध झाले.

ही रक्कम‎ अजूनही रुग्णांना परत करण्यात आली नाही.‎ अनेकवेळा मनपा आयुक्त व जिल्हाधिकारी‎ यांनी ही बाब पत्राद्वारे निदर्शनास आणून‎ दिली. मात्र, यावर कोणतीही कारवाई‎ प्रशासनाने केली नाही. यात मोठ्या प्रमाणात‎ घोळ करण्यात आल्याचे किरण गुडधे यांचे‎ म्हणणे आहे. तसेच कमलसुख विहार‎ सहकारी गृहनिर्माण संस्था म. अमरावती या‎‎‎‎‎‎‎‎‎‎‎ संस्थेच्या माध्यमातून झालेले सर्व भूखंड‎ विक्री, गहाणखत व हस्तांतरण व्यवहार‎ जिल्हाधिकारी यांची पूर्वपरवानगी न घेता‎ शासनाची दिशाभूल करून कोट्यवधी‎ रुपयांचा आर्थिक गैरकारभार करणाऱ्यांवर‎ कारवाई केली नाही.

गतवर्षी आरोग्य‎ उपसंचालक डॉ. वारे यांना अकोला येथे‎ जाऊन जिल्हा स्त्री रुग्णालय (डफरिन) व‎ जिल्हा सामान्य रुग्णालय (इर्विन)‎ अमरावती येथे लोकसंख्येच्या प्रमाणात‎ त्वरित मनुष्यबळ पुरवठा करण्याचे पत्र दिले.‎ परंतु, आजवर यावर कोणतीही कारवाई‎ केली नाही. मनुष्यबळाच्या कमतरतेमुळे‎ अनेक रुग्णांना योग्य उपचार न मिळाल्याने‎ रुग्ण दगावल्याच्या घटना घडलेल्या आहेत.‎‎‎‎‎‎ ‎

‎‎‎‎आरोग्य प्रशासन मुबलक प्रमाणात मनुष्यबळ‎ पुरवठा उपलब्ध करून देण्यात आला‎ नसल्याचा आरोप जय संविधानने केला‎ आहे. प्रलंबित मागण्यांच्या पूर्ततेसाठी‎ सोमवारपासून जिल्हाधिकारी कार्यालय‎ परिसरात बेमुदत उपोषण सुरू केले आहे.‎ यावेळी उपोषणात किरण गुडधे, हरिश‎ मेश्राम, नारायण थोरात, मो. शफी सौदागर,‎ गोपाल ढेकेकर, सुनील गायकवाड, संकेत‎ राहुळ, सतीश गजभिये, राजा गडलिंग, रवींद्र‎ फुले, धर्मा शेंडे, रितीक डिडिए, छगन‎ मुनेश्वर, वंश मुन, विवेक हिवराळे, परमेश्वर‎ वरठे, प्रवीण गाढवे, राजू थोरात, संजय‎ वानखेडे, नरेंद्र कठाणे आदी सहभागी झाले‎ आहे.‎