निदर्शने‎:आंबेडकरी संघटनांकडून मंत्री‎ चंद्रकांत पाटील यांचा निषेध‎

भाजप नेते आणि उच्च व तंत्र शिक्षण मंत्री‎ चंद्रकांत पाटील यांचे एक वक्तव्य चर्चेत‎ आहे. पैठणमधील एका कार्यक्रमात त्यांनी‎ महात्मा फुले, कर्मवीर भाऊराव पाटील, डॉ.‎ बाबासाहेब आंबेडकर यांच्या संदर्भात एक‎ वक्तव्य केले, या वक्तव्याचे आता‎ जिल्ह्यातही तीव्र पडसाद उमटू लागले‎ आहेत. आंबेडकरी चळवळीतील पक्ष,‎ संघटना आक्रमक झाल्याचे सोमवारी‎ पाहायला मिळाले. पाटील यांच्या निषेधार्थ‎ जिल्हाधिकारी मुख्य प्रवेशद्वारासमोर निदर्शने‎ केली. यावेळी पाटील यांच्या विरोधात तीव्र‎ नारेबाजी करण्यात आली. चंद्रकांत पाटील‎ यांच्यावर अँट्रोसिटी अंतर्गत गुन्हा दाखल‎ करण्यात यावा या मुख्य मागणीचे निवेदन‎ जिल्हाधिकाऱ्यांना देण्यात आले.‎ भाजप नेते चंद्रकांत पाटील यांनी एका‎ कार्यक्रमात महापुरुषांबद्दल आक्षेपार्ह विधान‎ केले.

त्यामुळे राज्यात संतापाची लाट‎ उसळलेली आहे. पाटील यांच्या निषेधार्थ‎ अनेक आंबेडकरी चळवळीतील पक्ष‎ संघटना रस्त्यांवर उतरल्याने दिसून येत‎ आहे. पाटील यांच्यावर अँट्रोसिटी अॅक्ट‎ अंतर्गत गुन्हा दाखल करावा, तसेच भीम‎ सैनिक मनोज गरबडे यांच्यासह अन्य‎ दोघांनी पाटील यांच्या निषेधार्थ केलेल्या‎ आंदोलनानंतर ३०७, १२० - ब, ३५३ अन्वये‎ गुन्हे दाखल केले. ते गुन्हे मागे घेण्यात यावे,‎ तसेच या घटनेनंतर पोलीस अधिकारी आणि‎ कर्मचाऱ्यांना निलंबित करण्यात आले,‎ त्यांच्यावरील निलंबनाची कार्यवाही मागे‎ घेण्यात यावी, या मागणीला घेऊन सोमवारी‎ विविध पक्ष ,संघटनांनी जिल्हाधिकारी‎ कार्यालय परिसरात निदर्शने करून शासनाचे‎ लक्ष वेधण्याचा प्रयत्न केला. तसेच यावेळी‎ पाटील यांच्या विरोधात तीव्र नारेबाजी केली.‎ यावेळी शिष्टमंडळाने जिल्हाधिकाऱ्यांना‎ निवेदन दिले.

यामध्ये भंते ज्ञानरत्न थेरो,‎ भीम ब्रिगेड, आझाद समाज पार्टी, भीम‎ आर्मी, शिवसेना, महाराष्ट्र युवा सेना,‎ वंचित, जय संविधान, राष्ट्रीय चर्मकार‎ महासंघ, पब्लिक पार्लमेंट, ओबीसी‎ महासभा, डॉ. बाबासाहेब आंबेडकर संघर्ष‎ समिती, भारतीय बौद्ध महासभा, ऑल‎ इंडिया पँथर सेना, रिपाई( गवई गट),‎ खोरिपा, आंबेडकरी साहित्य अकॅडमी आदी‎ पक्ष संघटनांचे पदाधिकारी, कार्यकर्ते‎ उपस्थित होते.‎