संतप्त महिलांचा महावितरण विरोधात एल्गार:विद्युत रोहित्राअभावी एकांबा येथे‎ रखडली मुख्यमंत्री पेयजल योजना‎

तालुक्यातील ग्राम एकांबा येथील ‎मुख्यमंत्री पेयजल योजनेचे काम पूर्ण ‎झाले असून, वारंवार मागणी करून ‎देखिल महावितरण विभागाकडून पेयजल योजना कार्यान्वित‎ करण्यासाठी विद्युत रोहित्र न ‎ बसवल्यामुळे योजनेचे काम पूर्ण‎ होऊन सुद्धा केवळ वीज‎ जोडणीअभावी गावकऱ्यांना विशेषत:‎ महिलांना पाण्यासाठी पायपीट करावी‎ लागत आहे. याचा निषेध करत‎ गावातील संतप्त महिलांनी २‎ जानेवारी रोजी एकांबा‎ ग्रामपंचायतीवर रिकामी भांडी घेऊन‎ आंदोलन केले.‎

एकांबा ग्रामपंचायत येथे मुख्यमंत्री‎ पेयजल योजनेचे काम पूर्ण झाले‎ असून सर्वच घरांमध्ये नळ देखील‎ बसवले आहेत. मात्र कायमस्वरूपी‎ विद्युत रोहित्र नसल्यामुळे मुबलक‎ ‎पाणी असून देखील पेयजल योजना‎ कोरडी पडली आहे. विद्युत रोहित्र‎ मिळवण्यासाठी ग्रामपंचायत एकांबा‎ येथील सरपंच नारायण चव्हाण यांनी‎ ११ ऑक्टोबर २०१९ रोजी‎ महावितरणला रितसर प्रस्ताव पाठवून‎ सदर प्रस्तावाच्या अनुषंगाने १९,९७९‎ रूपये रकमेचा २९ मे २०२० रोजी‎ भरणा केला आहे.‎

सलग ३ वर्षांपासून ग्रामपंचायत‎ एकांबाच्यावतीने पेयजल योजनेसाठी‎ रोहित्र बसवण्यासंदर्भात वेळोवेळी‎ पत्रव्यवहार केला, गतवर्षी १२ डिसेंबर‎ रोजी महावितरणचे अधीक्षक‎ अभियंता यांनी मिळालेल्या‎ तक्रारीनुसार कार्यकारी अभियंता‎ यांना एकांबा येथील तक्रारीचे‎ निवारण करण्यासंदर्भात सूचना‎ दिल्यात, मात्र महावितरणकडून‎ अद्याप कोणतीही पावले उचलण्यात‎ आलेली नाही. दरम्यान पेयजल‎ योजनेसाठी आवश्यक विद्युत रोहित्र‎ महिनाभरात न बसवल्यास ग्रामस्थ‎ जिल्हास्तरावर आंदोलन करतील.‎ तसेच हे प्रकरण न्यायालयात‎ खेचण्याचा इशाराही एकांबा येथील‎ सरपंच नारायण चव्हाण यांनी‎ महावितरणला दिला आहे.‎