खगोलीय घटना:नासाचं डार्ट अंतराळयान डायमॉर्फस अशनीवर आदळणार‎; मराठी विज्ञान परिषदेची माहिती

भविष्यात अशनीपासून पृथ्वीला‎ धोका निर्माण होऊ शकतो. नासाचं‎ डार्ट हे अंतराळ यान डायमॉर्फस या‎ अशनीवर आदळणार आहे. हा‎ आघात मुद्दाम घडवला जात आहे.‎ हा आघात भारतीय वेळेनुसार,‎ मंगळवार, २७ सप्टेंबर २०२२ रोजी‎ पहाटे ०४ वाजून ४४ मिनिटांनी घडून‎ येणार आहे. या खगोलीय घटनेचे‎ लाई‌व्ह चित्रण पाहणे शक्य असून‎ मराठी विज्ञान परिषदेच्या स्थानिक‎ शाखेने त्यासाठी विशेष सोय उपलब्ध‎ करुन दिली आहे.‎

डिडीमॉस हा छोटा अशनी‎ डायमॉर्फस या मोठ्या अशनी भोवती‎ चंद्रासारखा प्रदक्षिणा घालतो आहे.‎ डार्ट यानाच्या डायमॉर्फसशी होणाऱ्या‎ या टकरीचा उद्देश अशनीच्या कक्षेत‎ होणारा बदल अभ्यासणे, हा आहे. या‎ आघाताचं चित्रण डार्ट यानावरच्या‎ ड्रॅको या कॅमेऱ्याद्वारे केले जाईल.‎ भविष्यात जर कधी एखादा अशनी‎ पृथ्वीवर आदळणार असला, तर‎ आदळण्याआधीच त्याचा मार्ग बदल‎ करण्यासाठी हा अभ्यास उपयोगी‎ पडणार असून त्यादृष्टीने ही मोहीम‎ आखण्यात आली आहे.

या घटनेचे‎ थेट प्रक्षेपण पहाटे तीन वाजता सुरू‎ होईल. हौशी विद्यार्थी व‎ अभ्यासकांना ते एका विशिष्ट‎ लिंकद्वारे आपापल्या मोबाइलद्वारे‎ पाहता येईल, असे मराठी विज्ञान‎ परिषद अमरावतीचे अध्यक्ष प्रवीण‎ गुल्हाने यांचे म्हणणे आहे.‎ गुल्हाने म्हणाले, डायमॉर्फसचा‎ आकार सुमारे १७० मीटर असून,‎ डिडीमॉसचा आकार ८०० मीटर‎ इतका आहे.‎