चला जाणूया नदीला:नद्यांचे पुनरुजीवन होणे काळाची गरज‎

नद्यांमधून विषारी पाणी नव्हे, तर‎ अमृततुल्य पाणी वाहिले पाहिजे,‎ यासाठी नद्या पुनर्जीवित होणे ही‎ काळाची गरज असल्याचे मत‎ उपविभागीय अधिकारी मनोज‎ लोणारकर यांनी व्यक्त केले आहे.‎ महाराष्ट्र शासन व लोकसहभागातून‎ सुरू झालेल्या ‘चला जाणुया नदीला’‎ या अभियानांतर्गत दर्यापूर येथे‎ आयोजित आढावा बैठकीचे अध्यक्ष‎ म्हणून लोणारकर बोलत होते.‎ या अभियानांतर्गत अमरावती‎ जिल्ह्यातील ३ नद्यांची निवड राज्य‎ शासनाने केली आहे. त्यामध्ये‎ चिखलदरा येथे उगम झालेली व पुढे‎ अचलपूर, अंजनगाव व दर्यापूर या‎ तालुक्यातून वाहत अकाेला जिल्ह्यातील‎ मूर्तिजापूर तालुक्यातील सांगवा (मेळ)‎ येथे तापी खोऱ्यातील पुर्णा नदीस जाऊन‎ मिळणाऱ्या चंद्रभागा नदीचा समावेश‎ आहे.‎

जिल्हाधिकारी पवनीत कौर यांच्या‎ अध्यक्षतेखाली नुकत्याच पार पडलेल्या‎ जिल्हा बैठकीत चंद्रभागा नदीचे नोडल‎ अधिकारी म्हणून एसडीओ मनोज‎‎‎‎‎‎‎‎‎‎‎‎‎‎‎‎ लोणारकर व अचलपूरचे उपविभागीय‎ अधिकारी संदीप अपार यांची निवड‎ करण्यात आली आहे. चंद्रभागा व‎ तिच्या उपनद्या, नाल्या, ओढ्यांचे‎ पुनर्जीवन म्हणजे केवळ त्यांचे‎ खोलीकरण वा स्वच्छता नव्हे, तर या‎ नद्या अस्वच्छ, प्रदूषित होण्यामागील‎ कारणांचा शोध घेत ती कारणे समाज व‎ प्रशासकीय यंत्रणांनी हातात हात घेऊन‎ दूर करणे गरजेचे असल्याचे प्रतिपादन‎ चंद्रभागा नदीचे समन्वयक व‎ श्रमराज्यचे अध्यक्ष अरविंद नळकांडे‎‎‎‎‎‎‎‎‎‎‎‎‎‎‎‎ यांनी या बैठकीला संबोधीत करताना‎ केले.‎

बैठकीला उपविभागीय जल संधारण‎ अधिकारी वानखडे, मयुर कराळे, गट‎ विकास अधिकारी बाळासाहेब‎ रायबोले, विनोद खेडकर, सहाय्यक‎ गटविकास अधिकारी सी. जे. ढवक,‎ गट शिक्षणाधिकारी डाॅ. सुधीर डोंगरे,‎ विरेंद्र तराळे, सुनील स्वर्गीय, ए. एस.‎ वाघमारे, तालुका कृषी अधिकारी एस.‎ पी. हुड, वैद्यकीय अधिकारी डॉ. राजेंद्र‎ राहाटे, रामकृष्ण महाविद्यालयाचे प्रा.‎‎‎‎‎‎‎‎‎‎‎‎‎‎‎‎ प्रकाश म्हस्के, जे. डी. पाटील‎ महाविद्यालयाचे प्रा. राहुल सावरकर,‎ राधाबाई संगई महाविद्यालयाचे प्रा.‎ केशव माकोडे, कला वाणिज्य‎ महाविद्यालयाचे प्रा. व्ही. आर. राठोड,‎ जल वृक्ष चळवळीचे विजय विल्हेकर,‎ गोवर्धनसिंग शेखावत, लोकजागर‎ चळवळीचे आनंद संगई, देवानंद‎ महल्ले, संजय धारस्कर आदींनी‎ सहभाग नोंदवला. यशस्वीतेसाठी‎ दर्यापूर येथील उपविभागीय कार्यालयाचे‎ बंटी कावरे आदींनी सहकार्य केले.‎

दर्यापूर येथे आढावा बैठकीत मार्गदर्शन करताना एसडीओ मनोज लोणारकर व‎ उपस्थित चंद्रभागा नदीचे समन्वयक अरविंद नळकांडे व इतर.‎नदी संवाद यात्रेचे आयोजन‎ याआढावा बैठकीनंतर चंद्रभागा नदीचे‎ समन्वयक अरविंद नळकांडे यांनी‎ राजमाता जिजाऊ व स्वामी विवेकानंद‎ यांच्या जयंती दिवसाचे औचित्य‎ साधून १२ जानेवारी रोजी चंद्रभागा‎ नदी संवाद यात्रेच्या शुभारंभाची‎ घोषणा केली. प्रथम टप्प्याच्या या‎ संवाद यात्रेचा समारोप सुभाषचंद्र बोस‎ व बाळासाहेब ठाकरे यांच्या जयंती‎ दिनी २३ जानेवारी रोजी होणार‎ असल्याचे त्यांनी सांगीतले आहे.‎