राजापेठ पोलिस ठाण्यात एका विरुद्ध गुन्हा नोंद‎:वाळू वाहतूक करणाऱ्याची‎ पोलिस निरीक्षकांना धमकी‎

एका वाहनावर कारवाई न करता, ते‎ वाहन तुम्ही कसे साेडले, तसेच त्या‎ वाहनातील वाळू एमआयडीसी‎ परिसरात टाकल्याचा व्हिडीओ‎ व्हायरल करण्याची धमकी वाळू‎ वाहतुकीचा व्यवसाय करणाऱ्याने‎ वाहतूक शाखेच्या पोलिस‎ निरीक्षकांना दिली. या प्रकरणी‎ वाहतूक शाखेचे (पश्चिम) पोलिस‎ निरीक्षक राहुल आठवले यांनी‎ राजापेठ पोलिसात तक्रार दिली‎ आहे.या तक्रारीवरून‎ संबंधिताविरुद्ध गुन्हा दाखल‎ करण्यात आला आहे. ही घटना‎ शनिवारी (दि. ११) स्थानिक‎ एमआयडीसी परिसरात घडली.‎ सदर तक्रारीवरून राजापेठ‎ पोलिसांनी शेख आमिन (रा.‎ जुनीवस्ती, बडनेरा) याच्याविरुद्ध‎ शासकीय कामकाजात अडथळा‎ निर्माण केल्याप्रकरणी गुन्हा दाखल‎ केला आहे. पाेलिस निरीक्षक‎ आठवले हे शनिवारी पेट्रोलिंग‎ करीत असताना एमआयडीसी‎ चौकात त्यांना दोन ट्रकमधून‎ क्षमतेपेक्षा अधिक वाळूची वाहतूक‎ होत असल्याचे दिसले.

त्यांनी वाहने‎ थांबवून कागदपत्रांची पाहणी केली‎ असता एकाने त्यांच्यासमाेर येत‎ स्वत:ची ओळख करुन देत शेख‎ आमिन असे नाव सांगितले. मी‎ वाळूचा व्यवसाय करत असून‎ आपण पकडलेला ट्रक माझा आहे,‎ तो सोडून द्या, असे तो म्हणाला.‎ त्याला समजावून सदर वाहन‎ वाहतूक शाखेत घेऊन जात‎ असताना तिसरा ट्रक‎ एमआयडीसीमध्ये जाताना आठवले‎ यांना दिसला. ते वाहन थांबवून सदर‎ ट्रक देखील वाहतूक कार्यालयात‎ नेण्याची सूचना पाेलिस निरीक्षक‎ आठवले यांनी संबंधित‎ वाहनचालकाला केली. तेथून‎ आठवले थोड्या अंतरावर आले‎ असता वाहनचालक ट्रकमधील‎ वाळू एमआयडीसीतच खाली करत‎ असून, सदर वाहन वाहतूक शाखेत‎ आणण्यास नकार देत असल्याची‎ माहिती एका अंमलदाराने त्यांना‎ दिली.

त्यामुळे पाेलिस निरीक्षक‎ आठवले हे पुन्हा त्याठिकाणी‎ पोहोचले. यावेळी तेथे पुन्हा‎ आलेल्या शेख आमीन याने ‘तुम्ही‎ माझी गाडी कशी घेवून जाता, मी‎ पाहतो, एमआयडीसी परिसरात उभी‎ असलेली एक गाडी त्याचठिकाणी‎ खाली केल्या जात आहे. त्याचा‎ व्हिडीओ मी घेतला आहे. तो‎ व्हिडीओ व्हायरल करुन तुम्ही कशा‎ गाड्या सोडता, हे सांगून बदनामी‎ करतो, असे तो म्हणाला. या‎ प्रकरणी शनिवारी सायंकाळी‎ पाेलिस निरीक्षक आठवले यांनी‎ याबाबत तक्रार दिली.