महिनाभरानंतरही शहर बससेवा बंदच‎:अद्याप नव्या कंत्राटदारासोबत करारनामाच झाला नाही‎

जुन्या कंत्राटदाराशी करार संपुष्टात आणून‎ नवीन कंत्राटदार साहू टूर्स अॅण्ड ट्रॅव्हल्स यांना‎ शहर बसचे कंत्राट देण्यात आले. परंतु, नगर‎ सचिव कार्यालयाने नव्या कंत्राटदारासोबत‎ करारनामा करण्यास अद्याप ठरावच मंजूर केला‎ नाही. त्यामुळे एक महिना उलटला तरी शहर‎ बस सेवा अद्याप सुरू झाली नाही. परिणामी‎ शहरवासीयांमध्ये राेष व्यक्त हाेत आहे.‎ नव्या कंत्राटदाराकडे जबाबदारी‎ सोपवल्यानंतरही शहर बस सेवा सुरू झाली‎ नसल्याने नागरिकांना त्रास सहन करावा लागत‎ आहे. जास्त पैसे खर्च करून पर्यायी वाहनांनी‎ प्रवास करावा लागत आहे.

अनेकांना बडनेरा‎ येथे जाण्यासाठी या शहर बसेस फारच‎ सुविधाजनक होत्या. परंतु, शहर बस सुरू‎ होईपर्यंत लोकांना भुर्दंड सहन करावा लागणार‎ आहे. पृथ्वी टूर्सच्या संचालकांनी बँकेकडून‎‎‎‎‎‎‎‎‎‎‎ ५ कोटीचे कर्ज घेतले होते. त्यानंतर दोन वर्षे‎ कोरोनामुळे शहर बस सेवा बंद राहिली. त्यामुळे‎ त्यांना कर्जाचे हप्ते थकले. कोरोनानंतर शहरात‎ २५ शहर बसेस धावत होत्या. यासाठी प्रति‎ किमी. ५.३२ रुपये रॉयल्टी दरमहा कंत्राटदाराला‎ मनपाकडे भरणे आवश्यक होते. परंतु, रॉयल्टी‎ थकीत ठेवण्यासोबतच बँकेचे २.४२ कोटीचे‎ कर्ज भरले नसल्यामुळे मनपा आयुक्तांनी हा‎ करार एक महिन्याआधी रद्द केला.‎

मंजुरी मिळताच पुढील कारवाई‎शहर बस सुरू करण्यासाठी‎ कंत्राटदारासोबत करारनामा करणे आवश्यक‎ आहे. परंतु, अद्याप नगर सचिवांनी‎ करारनाम्याच्या ठरावाला मंजुरी दिली‎ नसल्याने काम रखडले आहे. मंजुरी मिळाली‎ की तत्काळ पुढील कारवाई होणार.‎ - लक्ष्मण पावडे, सहायक अभियंता, कार्यशाळा.‎