25 लाखांची मागितली होती खंडणी, रकमेसह सोने लंपास‎:रिव्हॉल्व्हरच्या धाकावर अपहरण‎ करुन खासगी डॉक्टरला लुटले‎

तालुक्यातील नवरगाव येथील दवाखाना बंद‎ करुन स्कूटीने मारेगाव येथे स्वगृही परत‎ जाताना चार अज्ञात चोरट्यांनी‎ रिव्हॉल्व्हरच्या धाकावर एका खासगी‎ डॉक्टरचे सिने स्टाईल अपहरण करून‎ लुटल्याची खळबळजनक घटना मारेगाव‎ नजीक नायरा पेट्रोल पंपाजवळ सोमवार, दि.‎ १३ मार्च रोजी सायंकाळच्या सुमारास घडली.‎ ऐन रहदारीच्या परिसरात ही मोठी घटना‎ घडल्याने तालुक्यात एकच खळबळ माजली‎ आहे. पोभास रवींद्रनाथ हाजरा वय ४५ वर्ष,‎ रा. मंगलम् पार्क, असे लुटण्यात आलेल्या‎ खासगी डॉक्टरचे नाव आहे.‎ डॉ. हाजरा यांचे तालुक्यातील नवरगाव येथे‎ खासगी रुग्णालय आहे. ते नेहमी प्रमाणे‎ रुग्णालय बंद करुन सोमवारी सायंकाळी ७ ते‎ ८ वाजता दरम्यान मारेगावकडे अॅक्टिव्हा‎ क्रमांक एमएच २९ बीबी-२८६७ ने परत येत‎ होते.

अशात करंजी-वणी राज्य महामार्गावर‎ मारेगाव नजीक नायरा पेट्रोल पंपजवळ डॉ.‎ हाजरा यांचे दुचाकीला सिरीज क्रमांक‎ नसलेल्या पांढऱ्या रंगाची कार क्रमांक एमएच‎ ३१-६३०७ ने अचानक आडविले. त्यावेळी‎ कार मधील २८ ते ३२ वयोगटातील चार‎ अज्ञात इसमापैकी तिघे जण खाली उतरले.‎ एकाने दुचाकी धरली, तर दुसऱ्याने‎ रिव्हॉल्व्हर लावली आणि तिसऱ्याने जिवे‎ मारण्याची धमकी देत बळजबरीने डॉ. हाजरा‎ यांना कारमध्ये बसविले. यावेळी रिव्हॉल्व्हर‎ धाक दाखवित त्यांच्याजवळील रोख २४‎ हजार, १५ हजार रुपये किंमतीचे ५ ग्रॅम‎ वजनाची सोन्याची अंगठी, ३० हजार‎ किंमतीचा १२ ग्रॅम वजनाचा सोन्याचा गोप‎ हिसकावला. चोरटे इथेच न थांबता‎ फिर्यादीला जीवे मारण्याची धमकी देत चक्क‎ पुन्हा २५ लाखांची मागणी केली.

दरम्यान,‎ फिर्यादीने वणी येथील एका मित्राला तीन‎ लाख रुपये घेवून बोलवत एका‎ ऑटोमोबाइल दुकानासमोर कारचा अर्धा‎ काच खाली करुन तीन लाख रुपये घेतले.‎ तद्नंतर डॉ. हाजरा यांना जीवे मारण्याच्या‎ धमक्या देत कारच्या खाली उतरवून‎ चोरट्यांनी पळ काढला. घटनेनंतर लगेच डॉ.‎ हाजरा यांनी मारेगाव पोलिस ठाण्यात धाव‎ घेत घडलेली आपबीती पोलिसांना‎ सांगितली. मारेगाव पोलिसांनी त्या चार‎ अज्ञात चोरट्या विरोधात कलम ३९२, ३६३,‎ ३६४, (अ), भादंवी सहकलम ३/२५, ४/२५‎ अंतर्गत गुन्हा दाखल करण्यात आला. पुढील‎ तपास ठाणेदार राजेश पुरी करीत आहे. या‎ घटनेचे गांभीर्य ओळखून १४ मार्च रोजी‎ अतिरिक्त जिल्हा पोलिस अधीक्षक पीयूष‎ जगताप यांनी मारेगाव गाठले. प्रकरणाचा‎ छडा लावण्याच्या दृष्टीने आवश्यक पावले‎ उचलण्यासंदर्भात स्थानिक पोलिसांना निर्देश‎ दिले.‎