शिबीर उत्साहात:बेरोजगारांसाठी केव्हीआयसीचे‎ जागरूकता शिबीर उत्साहात‎

सुशिक्षित बेरोजगारांनी आपला उद्योग व्यवसाय‎ सुरू करुन आत्मनिर्भर व्हावे तसेच इतरांना‎ रोजगार द्यावे या उदात्त ध्येयातून खादी व‎ ग्रामोद्योग आयोगातर्फे येथील संविधान चौक‎ स्थित लॉर्ड बुद्ध विहारात जनजागृती मेळावा व‎ मार्गदर्शन शिबिराचे आयोजन करण्यात आले‎ होते. या शिबिराचा यवतमाळ करांनी लाभ‎ घेतला. कार्यक्रमाला शासकीय अभियांत्रिकी‎ महाविद्यालयाचे प्राचार्य डॉ. प्रभाकर खोडके,‎ ॲड. जयसिंह चव्हाण, खादी व ग्रामोद्योग‎ आयोग नागपूरचे विभागीय संचालक राघवेंद्र‎ महिंद्रकर, जिल्हा समन्वयक आशा चहांदे,‎ पर्यावरण व निसर्ग संस्थेचे कोषाध्यक्ष राजेश‎ सोनटक्के प्रामुख्याने उपस्थित होते.‎

याप्रसंगी डॉ. खोडके म्हणाले, केंद्र शासनाचे‎ अधिकारी आपल्या दारी आले आहेत,त्यांच्या‎ विविध योजनांचा युवक- युवतींनी लाभ घ्यावा व‎ स्वतः ला सक्षम करावे.‎ ॲड. जयसिंग चव्हाण यांनी नविन उद्योजकांना‎ ही सुवर्णसंधी असून आपल्या परिसराचा‎ अभ्यास करावा मागणी व उपलब्धता पडताळून‎ बघावे व पीएमईजीपी योजनेचा लाभ घेऊन‎ आत्मनिर्भर होण्याचे आवाहन केले.

समारोपीय‎ मार्गदर्शनात महिंद्रकर म्हणाले, पीएमईजीपी‎ योजनेत एक लाख रुपयांपासून पन्नास लाख‎ रुपयांपर्यंत आपण कर्ज घेऊ शकता. तसेच यावर‎ केव्हीआयसी तर्फे ३५ टक्के पर्यंत सबसिडीची‎ तरतूद आहे.केव्हीआयसीच्या विविध‎ योजनांसाठी आमच्या जिल्हा समन्वयक यांचेशी‎ किंवा नागपूर विभागीय कार्यालयाशी संपर्क साधू‎ शकता. कार्यक्रमाचे सूत्रसंचालन राजेश‎ सोनटक्के यांनी तर आभार आशा चहांदे यांनी‎ मानले. कार्यक्रमाच्या यशस्वितेसाठी मकसूद‎ अली यांनी परिश्रम घेतले.‎