‎ अवकाळी पावसाने हजेरी:मंगरूळपीरला पुन्हा गारपिटीचा तडाखा; पिकांना फटका‎

जिल्ह्यात गेल्या दोन दिवसांपासून‎ विजेच्या कडकडाटासह अधूनमधून‎ अवकाळी पावसाने हजेरी लावली.‎ मंगरूळपीर तालुक्यात रविवारी‎ सायंकाळी वादळी वारा, विजांच्या‎ कडकडाटात गारपिटीसह झालेल्या‎ अवकाळी पावसाचा जोरदार तडाखा‎ बसला. गारपिटीने आंबा, पपई,‎ टरबूज, उन्हाळी तिळ, मूग,‎ भाजीपाला पिकांचे नुकसान झाले ‎.‎ रविवारी सायंकाळी मंगरूळपीर‎ तालुक्यातील कोठारी, येडशी,‎ कंझारा, बोरव्हा, चांधई, चेहल,‎ धानोरा, कवठळ, मोहगाव्हण‎ परिसरात जोरदार गारपीट झाली.‎ वादळी वाऱ्यामुळे गोगरीत पपई,‎ आंबा, बिजवाई कांदा, भाजीपालासह‎ इतर पिकांना मोठा फटाका बसल्याने‎ शेतकरी पुन्हा संकटात सापडला‎ आहे. मंगरूळपीर शहरालगतच्या‎ बालदेव येथील राजू चक्के यांच्या‎ पपई फळबागेचे वादळीवारा व‎ गारपिटीने माेठे नुकसान झाले.‎

वादळी वाऱ्यामुळे त्यांच्या शेतातील‎ काही झाडे तुटून शेतातील टरबूज‎ पिकाचे नुकसान झाले आहे.‎ तालुक्यातील गोगरी हे गाव‎ गावरान आंब्यांसाठी प्रसिद्ध आहे.‎‎‎‎‎‎‎‎‎‎ रविवारी रात्री वादळी वाऱ्यासह‎ झालेल्या अवकाळी पावसामुळे‎ आंब्याच्या झाडाखाली आंब्याचा‎ अक्षरश: सडा पडला. त्यामुळे या‎ शेतकऱ्यांना नुकसानीचा माेठा फटका‎ बसला आहे. तसेच तालुक्यात अनेक‎‎‎‎‎‎‎‎‎‎ शेतकऱ्यांनी काढणी करुन‎ सुकवण्यासाठी ठेवलेली हळदही‎ खराब झाली आहे. वादळी वाऱ्यामुळे‎ हळदीवर टाकलेल्या ताडपत्री उडून‎ गेल्याने अनेक शेतकऱ्यांची हळद‎ पावसाने भिजली आहे. दरम्यान,‎‎‎‎‎‎‎‎‎‎ अवकाळी पावसामुळे मंगरूळपीर‎ येथील उपविभागीय पोलिस‎ अधिकारी कार्यालयाची ही पडझड‎ झाली आहे. तर तालुक्यातील कंझरा‎ येथील मदन किसनराव मुखमाले‎ यांच्या घरावर वीज कोसळल्याने‎‎‎‎‎‎‎‎‎‎ नुकसान झाले. तालुक्यातील अनेक‎ गावांतील वीजपुरवठा खंडीत झाला.‎ सेलू बाजार परिसरातील सुमारे ३०‎ गावांचा खंडीत झालेला वीज पुरवठा‎ २४ तासानंतर सुरळीत करण्यात‎ महावितरणला यश आले.‎