ट्रक -दुचाकी अपघातात 2 ठार‎:बाभूळगाव तालुक्यातील नांदुरा बु. येथील घटना‎

ऊसाने भरलेल्या ट्रकचा टायर फुटल्याने तो‎ अनियंत्रित होऊन त्याने विरूद्ध दिशेने येणाऱ्या‎ दुचाकी स्वारास समोरा समोर जोरदार धडक‎ दिली. या अपघातात दुचाकीवरील दोघेही‎ जागीच ठार झाले. ही घटना बुधवारी ( ता . ८ )‎ रोजी रात्री ८.१५ वाजताच्या सुमारास घडली.‎ यात अनियंत्रित झालेला ट्रक रस्त्यालगतच्या‎ दरीत जाऊन पलटी झाला. ट्रकचालक ट्रकच्या‎ कॅबिनमध्ये फसलेला होता.

त्याला काढण्याचे‎ प्रयत्न परिसरातील नागरिक व बाभूळगाव येथील‎ पोलीस करीत होते.‎ एम.एच. ३१ सी.बी. ६७३६ या क्रमांकाचा‎ ट्रक अमरावती जिल्ह्यातून देवगाववरून‎ बाभूळगावकडे ऊस भरून येत होता. तर‎ विरूद्ध दिशेने येणारी एम.एच. २९ बी.वाय.‎ २०३१ या दुचाकीने दोघे येत होते. त्यात‎ बाभुळगाव तालुक्यातील पालोती येथील सुभाष‎ गुबरे ( वय ५० ) व सिनान्ना पवार ( वय ६०‎ ) यांचा समावेश होता. ते दोघे जण आर्णी‎ तालुक्यातील नवआटी येथून अंत्यविधीचा‎ कार्यक्रम आटपून घरी परत येत होते. अगदी‎ हाकेच्या अंतरावर आलेल्या दुचाकीस्वारांना‎ उसाने भरलेल्या ट्रकने अचानक चिरडले.

यात‎ या दोघांचाही जागीच मृत्यु झाला. घटनेची‎ माहीती परिसरातील नागरिकांना कळताच‎ घटना स्थळावर ग्रामस्थाचा जमाव प्रचंड‎ प्रमाणात झाला होता. मृतदेह बाभूळगाव येथील‎ ग्रामीण रुग्णालयात नेण्यात आले. तर‎ ट्रकचालक हा चेंदामेंदा झालेल्या ट्रकच्या‎ कॅबिनमध्ये अडकलेल्या अवस्थेत होता.‎ त्याला काढण्यासाठी बाभूळगाव पोलीस यंत्रणा‎ कसोशीने प्रयत्न करीत होते.‎