कारवाई:वाळू तस्करी करताना दाेन ट्रॅक्टर‎ जप्त; 4 जणांविरुद्ध गुन्हा दाखल‎

पुसद तालुक्यातील सावरगाव बंगला येथे दि. ५‎ एप्रिलला सायंकाळी पावणेसहाच्या सुमारास‎ वाळूने भरलेले दोन ट्रॅक्टर जप्त करण्यात आले‎ आहे. शेंबाळपिंपरी ते सावरगाव बंगला रस्त्यावर‎ पेट्रोलिंग दरम्यान कारवाई केली. या प्रकरणी‎ खंडाळा पोलिस ठाण्यात गुन्हे दाखल करण्यात‎ आले आहे.‎ खंडाळा पोलिस ठाण्यातील कर्मचारी‎ भीमराव आडे यांनी दिलेल्या तक्रारीवरून‎ हिंगोली जिल्ह्यातील कळमनुरी तालुक्यातील‎ डोंगरगाव येथे राहणाऱ्या शामराव धुळे, पुसद‎ तालुक्यातील देवगाव येथील संतोष काळे,‎ शेंबाळपिंपरी येथील संजय कडेल व देवगाव‎ येथील मंगेश चंदेल या चौघांवर गुन्हे दाखल‎ करण्यात आले आहे. पोलिस सूत्रांकडून‎ मिळालेल्या माहितीनुसार, शामराव व संतोष हे‎ दोघे सावरगाव बंगलाकडे जाणाऱ्या रस्त्यावरून‎ ट्रॅक्टर ( एमएच-२९-ब व्ही-६१५४) ५ हजार‎ रुपये किमतीची एक ब्रास वाळू ट्रॉलीमध्ये घेऊन‎ जाताना पेट्रोलिंग दरम्यान अडवले होते.‎ तपासात तस्करी करत असल्याचे निदर्शनास‎‎‎‎‎‎‎‎‎‎‎‎ आल्याने पोलिसांनी एकूण ६ लाख ५ हजार‎ रुपयांचा मुद्देमाल जप्त केला आहे.

तर त्याच‎ रोडवर ट्रॅक्टरमधून ( एमएच २९-एके-५०९)‎ एक ब्रास वाळू जप्त करण्यात आली. पेट्रोलिंग‎ दरम्यान पोलिसांनी कारवाई करीत मुद्देमाल जप्त‎ केला. अधिक तपास खंडाळा ठाणेदार बालाजी‎ शेंगेपल्लू यांच्या मार्गदर्शनाखाली सुरू आहे.‎ खंडाळा पोलिस ठाण्याच्या हद्दीमध्ये मोठ्या‎ प्रमाणात अवैधरीत्या वाळूची तस्करी होत‎ असल्याचे पितळ उघड झाले असून अवैध‎ वाळू तस्करी करणाऱ्यांचे मात्र पोलिसांच्या‎ कारवाईने धाबे दणाणले आहे.