कार्यशाळा:नवीन शैक्षणिक धोरणातील आव्हाने‎ स्वीकारली तरच स्पर्धेत टिकाव लागेल‎

जागतिकीकरणाच्या वर्तमान युगातील‎ स्पर्धेत टिकून राहण्यासाठी उच्च दर्जाचे‎ ज्ञान व तंत्रज्ञान विकसित करणे‎ आवश्यक असून, त्यासाठी नवनवीन‎ कौशल्याधिष्ठित शिक्षण व प्रशिक्षण घेणे‎ काळाची गरज आहे. तेव्हा राष्ट्रीय‎ स्तरावर राबवल्या जाणाऱ्या नवीन‎ शैक्षणिक धोरणातील आव्हाने‎ विद्यार्थ्यांनी स्वीकारली तरच स्पर्धेत‎ टिकाव लागेल असे आवाहन शिवाजी‎ विद्यापीठ, कोल्हापूरचे उपकुलसचिव‎ डॉ. विलास सोयाम यांनी केले. ते आर्णी‎ येथील स्व. राजकमल भारती कला,‎ वाणिज्य महाविद्यालयातील वाणिज्य व‎ अर्थशास्त्र विभागाद्वारे आयोजित रिसेंट‎ रिफॉर्मस् इन हायर एज्युकेशन या‎ विषयावरील कार्यशाळेत बोलत होते.‎

कार्यक्रमाच्या अध्यक्षस्थानी‎ महाविद्यालयाचे प्राचार्य डॉ. निवृत्ती‎ पिस्तुलकर तर प्रमुख मार्गदर्शक म्हणून‎ उपकुलसचिव डॉ. विलास सोयाम व‎ प्रमुख अतिथी म्हणून संस्थेचे संचालक‎ डॉ. शशिकांत वानखडे, वाणिज्य विभाग‎ प्रमुख डॉ. विनीत माहूरे, कला शाखा‎ प्रमुख प्रा. सदानंद बोळे, विज्ञान शाखा‎ प्रमुख डॉ. मनोज काकपुरे विचार‎ पीठावर उपस्थित होते. डॉ. सोयाम यांनी‎ आपल्या मार्गदर्शनपर भाषणात सांगितले‎ की, ज्या महाविद्यालयातून मी वाणिज्य‎‎‎‎‎‎‎‎‎‎‎‎‎‎‎‎‎‎‎ शाखेची पदवी घेवून कोल्हापूर‎ विद्यापीठात उपकुलसचिव यासारखे‎ सन्मानाचे पद प्राप्त केले. त्याच माझ्या‎ महाविद्यालयात माझा सत्कार करून‎ कार्यशाळेत उद्बोधन करण्याची संधी‎ मिळाली मी स्वतःला भाग्यशाली मानतो.‎

बांधकामावर मोलमजुरी करणाऱ्या‎ माझ्यासारख्या एका गरीब विद्यार्थ्याच्या‎ पंखात उंच भरारी मारण्याचे बळ देणाऱ्या‎ या सर्व गुरु जनांचा मी ऋणी आहे. ज्या‎ महाविद्यालयाने मला घडवलं त्या‎ महाविद्यालयातील पुढच्या पिढीने देखिल‎ यशाची नवनवी शिखरे पादाक्रांत करावी‎‎‎‎‎‎‎‎‎‎‎‎‎‎‎‎‎‎‎ अशी माझी प्रामाणिक इच्छा आहे असे‎ मत व्यक्त केले.‎ विद्यार्थ्यांनी काळाची पावले ओळखून‎ स्पर्धेत टिकण्यासाठी प्रयत्नांची‎ पराकाष्ठा करावी. निर्धारीत लक्ष्ये‎ गाठण्यासाठी प्रचंड मेहनत, चिकाटी‎ आणि सातत्य आवश्यक असल्याचे‎ आवाहन डॉ सोयाम यांनी केले. परंतू‎ ध्येयापासून विचलित करणारे अनेक‎ घटक समाजात सक्रीय असतात जे‎ युवकांना आकर्षित करतात. यापासून‎ युवकांनी नेहमी सावध झालं पाहिजे.‎

आपल्यातील कौशल्य विकासासोबतच‎ एक संवेदनशील माणूस म्हणून देखिल‎ ओळख निर्माण करता आली पाहिजे.‎ असे त्यांनी मोलाचे मार्गदर्शन त्यांनी या‎ प्रसंगी केले.‎ डॉ. सोयाम यांनी यावेळी खारीचा‎ वाटा म्हणून या वर्षापासून वाणिज्य‎ शाखेतून प्रथम येणाऱ्यास १० हजार‎ रूपये शिष्यवृत्ती देण्याचे जाहीर केले.‎ प्राचार्य निवृत्ती पिस्तुलकर यांनी आपल्या‎ अध्यक्षीय भाषणात उपकुलसचिव डॉ.‎ विलास सोयाम यशामुळे केवळ त्यांच्या‎ परिवाराचेच नाव मोठे झाले नसून‎ आपल्या महाविद्यालयाच्या व‎ आर्णीच्याही लौकिकात भर पडली आहे.‎

सर्व विद्यार्थ्यांनी त्याच्या पावलावर‎ पाऊल टाकून यशाचं शिखर गाठलं‎ पाहिजे. त्यांनी सुरू केलेली ही दहा‎ हजार रुपयाची शिष्यवृत्ती एक मैलाचा‎ दगड ठरणार आहे. त्यामूळे त्यांचं करावं‎ तेवढं कौतुक कमी आहे असे प्रतिपादन‎ केले. कार्यक्रमाचे संचालन प्रा.मिलिंद‎ पांडे तर डॉ. विनीत माहुरे यांनी आभार‎ व्यक्त केले. या कार्यशाळेला कला व‎ वाणिज्य शाखेतील विद्यार्थी मोठ्या‎ संख्येने सहभागी झाले होते. शेवटी‎ प्रश्नोत्तराच्या सत्रात उपकुलसचिव‎ विलास सोयाम यांनी विद्यार्थ्याच्या‎ अनेक समस्या जाणून घेतल्या व‎ विचारलेल्या विविध प्रश्नांची‎ सकारात्मक उत्तरे देवून विद्यार्थ्यांचा‎ आत्मविश्वास वाढविला.‎