हल्ला:उत्सवात फलक लावण्याच्या वादातून तरुणावर चाकूने वार, खुपसलेल्या चाकूसह तरुण रुग्णालयात दाखल, हल्लेखोर पसार

यवतमाळ जिल्ह्यात उत्सवात फलक लावण्यावरून झालेल्या वादात तरूणावर चाकूने पाठीत वार करण्यात आले. जखमी तरुण शरिरात खुपसलेल्या चाकूसह तसाच रुग्णालयात दाखल झाल्याची घटना समोर आली आहे.

नक्की काय घडले?

यवतमाळ जिल्ह्यातील रामनगर लोहारा येथे राहणारा हा तरूण असल्याचे समजते. हा तरुण परिसरात मोलमजुरी करतो. रामनवमीच्या उत्सवानिमित्त लावण्यात आलेल्या फलकावरून वाद झाला. उत्सवासाठी लावलेला फलक फाडण्यात आल्याने तणाव निर्माण झाला होता. तेंव्हा हल्लेखोरांनी तरुणास घराबाहेर येण्यास सांगितले आणि नेमके काय घडले याची माहिती नसल्याचे त्याबद्दल विचारत असतानाच हल्लेखोरांनी त्याच्यावर वार केला.

शस्त्रक्रीया करून चाकू बाहेर

पाठीत वार केलेला चाकू तसाच हाताने तरुणाने धरून ठेवला. यामुळे हल्लेखोराला पुन्हा वार करण्याची संधी मिळाली नाही. तेव्हा झालेल्या गोंधळानंतर आजूबाजूचे लोक बाहेर आले. त्यांना पाहताच हल्लेखोरांनी तिथून पळ काढला. हल्ल्यात जखमी झालेल्या दीक्षितला दुचाकीवरून रुग्णालयात दाखल करण्यात आले. त्याच्या पाठीत खुपसलेला चाकू शस्त्रक्रिया करून बाहेर काढण्यात आला.