लोकार्पण:15 लाखांच्या लोकसहभागातून पालटले टाकरवण शाळेचे रुपडे‎

तालुक्यातील टाकरवण येथील जिल्हा परिषद‎ शाळेचे रुपडं ग्रामस्थांच्या पुढाकारातून पालटले‎ आहे. शाळेच्या भिंती बोलक्या झाल्या आहेत.‎ आतापर्यंत ग्रामस्थांनी लोकवर्गणीतून शाळेला १५‎ लाख रुपयांचा खर्च केला असून नुकताच‎ साडेपाच लाख रुपयांचा संगणक कक्ष तयार करुन‎ लोकार्पण करण्यात आले.‎ टाकरवण येथे जिल्हा परिषदेची पहिली ते चौथी‎ पर्यंतची शाळा आहे.

शाळेमध्ये २५२ विद्यार्थी सध्या‎ शिक्षण घेत आहेत. जिल्हा परिषदेची सरकारी‎ शाळाही खासगी शाळांच्या स्पर्धेत टिकून रहावी‎ यासाठी मुख्याध्यापक, शालेय व्यवस्थापन समिती‎ आणि गावकऱ्यांनी पुढाकार घेत मागील चार वर्षात‎ १५ लाख रुपयांची वर्गणी करुन शाळेला दिली‎ आहे. यातून शाळेच्या वर्ग खोल्या डिजिटल‎ करण्यात आल्या आहेत.

वृक्षारोपण व वृक्ष संगोपन‎ केले गेले आहे. वर्गांमध्ये फॅन, एलईडी टिव्ही‎ आणि विजेची जोडणीही दिली गेली आहे. शुद्ध‎ पाण्यासाठी फिल्टर बसवण्यात आले आहे.‎ शाळेच्या परिसरात सुरक्षेसाठी सीसीटीव्ही बसवले‎ गेले आहेत. पोषण आहाराच्या किचन शेडचे काम‎ केले गेले असून भाज्या खराब होऊ नयेत यासाठी‎ फ्रिज उपलब्ध करुन दिला आहे. संरक्षण भिंतीचे‎ काम करुन प्रवेशद्वार बसवले आहे.‎

अत्याधुनिक संगणक कक्ष‎
गावकऱ्यांनी साडेपाच लाख रुपये खर्चून अत्याधुनिक संगणक‎ कक्ष उभारला आहे. यामध्ये एकूण १६ संगणक उपलब्ध करुन‎ दिले गेले आहेत. शनिवारी या संगणक कक्षाचे उद्घाटन‎ मान्यवरांच्या हस्ते करण्यात आले.‎

अडचणींवर मात करून काम‎
गावातील मुलांना चांगले शिक्षण मिळावे यासाठी शाळेचे रूपडे‎ पालटल्याचे शाळा व्यवस्थापन समिती अध्यक्ष दयानंद गोबर‎ म्हणाले तर, कोरोनात अडचणी येऊनही ग्रामस्थांनी काम सुरु‎ ठेवले त्यामुळे शाळा डिजिटल झाली असून याचा विद्यार्थ्यांना‎ फायदा होत असल्याचे मुख्याध्यापक रत्नाकर वाघमारे‎ म्हणाले.‎