दिव्य मराठी विशेष:चार महिन्यांत 16 लाख वृद्धांचा एसटीने प्रवास‎

स्वातंत्र्याच्या अमृतमहोत्सवानिमित्त ऑगस्ट‎ महिन्यात राज्यातील ७५ वर्षांवरील‎ नागरिकांना एसटीतून मोफत प्रवास‎ करण्यासाठी ’अमृत ज्येष्ठ नागरिक योजना’‎ घोषित करण्यात आली आहे. त्यानुसार या‎ योजनेअंतर्गत बीड विभागातून ऑगस्ट ते‎ नोव्हेंबर या ४ महिन्यात १६ लाख ६९ हजार २५‎ ज्येष्ठ नागरिकांनी मोफत प्रवासाचा आनंद‎ लुटला आहे.‎

स्वातंत्र्याच्या अमृत महोत्सवाची ज्येष्ठ‎ नागरिकांना भेट म्हणून एसटी महामंडळातर्फे‎ २५ ऑगस्टला मुख्यमंत्री एकनाथ शिंदे व‎ उपमुख्यमंत्री देवेंद्र फडणवीस यांच्या हस्ते‎ ज्येष्ठांना मोफत प्रवास योजनेसाठी‎ प्रमाणपत्राचे वितरण करून योजनेचा शुभारंभ‎ केला या योजनेंतर्गत ज्येष्ठ नागरिकांना‎ राज्याच्या हद्दीपर्यंत कुठेही मोफत प्रवास‎ करता येतो. बीड विभागात अमृत ज्येष्ठ‎ नागरिक योजनेचा शुभारंभ झाल्यानंतर‎ नागरिकांनी मोठ्या प्रमाणात लाभ घेतला.‎ ऑगस्ट , सप्टेंबर, ऑक्टोबर व नोव्हेंबर या‎ चार महिन्यात १६ लाख ६९ हजार २५ ज्येष्ठ‎ नागरिकांनी मोफत प्रवास करुन या योजनेचा‎ लाभ घेतला. दर महिन्याला या योजनेचा लाभ‎ घेणाऱ्या ज्येष्ठांची संख्या वाढतच आहे.१६‎ लाख ज्येष्ठांच्या अमृत योजनेतील‎ प्रवासापोटी लाल परीच्या तिजोरीत १०‎ कोटींच्या उत्पन्नाची भर पडली आहे. चार‎ महिन्यांत एसटीला या उपक्रमातून १० कोटी ५‎ लाख ३६ हजार ५४७ रुपयांचे उत्पन्न मिळाले.

अंबाजोगाई आगाराचे सर्वाधिक प्रवासी‎
परळी आगारातून २ लाख ३१ हजार ७८३ जणांनी, धारूर २‎ लाख २ हजार २२६, माजलगाव २ लाख ३८ हजार ५३६,‎ गेवराई १ लाख ८१ हजार ६१ ज्येष्ठांनी, पाटोदा १ लाख ४२‎ हजार ११८, आष्टी आगारातून ८५ हजार २० आणि अंबाजोगाई‎ आगारातून ३ लाख ७८ हजार ६०२ जणांनी प्रवास केला.‎

प्रतिसाद वाढतो आहे‎
जिल्ह्यात अमृत ज्येष्ठ नागरिक मोफत प्रवास या योजनेला‎ ज्येष्ठांचा प्रतिसाद मोठ्या प्रमाणावर मिळत आहे. प्रवासात‎ ज्येष्ठांना चांगली सेवा मिळावी याबाबतही सूचना दिल्या‎ आहेत. ज्येष्ठांची हेळसांड होणार नाही याची काळजी राज्य‎ परिवहन महामंडळाकडून घेतली जात आहे.‎ -अजयकुमार मोरे, विभागीय नियंत्रक, रापम, बीड‎

ओळखपत्र दाखवा;‎ लाभ मिळवा‎ या योजनेच्या लाभासाठी‎ ज्येष्ठ नागरिकांकडे‎ आधारकार्ड, पॅनकार्ड,‎ पारपत्र, निवडणूक‎ ओळखपत्र, केंद्र, राज्य‎ शासनातर्फे निर्गमित‎ केलेल्या ओळखपत्रापैकी‎ कुठलेही एक वयाचे‎ ओळखपत्र आवश्यक‎ आहे. वरीलपैकी कोणतेही‎ ओळखपत्र दाखवल्यास‎ ७५ वर्षांवरील मोफत प्रवास‎ करता येतो.‎