माजलगावातील जीवनश्री पतसंस्थेचा घोटाळा उघड:मुदतीनंतरही ठेव दिली नसल्याने गुन्हा दाखल

निवृत्त कर्मचाऱ्याने सेवानिवृत्तीचे मिळालेले १८ लाख ९५ हजार रुपये रक्कम विश्वासाने पतसंस्थेत मुदत ठेव म्हणून ठेवली, मात्र मुदत संपूनही पतसंस्था पैसे परत करत नसल्याने अखेर निवृत्त कर्मचाऱ्याने पोलिसांत धाव घेतली. याप्रकरणी पतसंस्थेचा अध्यक्ष, सचिव व इतर पदाधिकाऱ्यांवर गुंतवणूकदार हित संरक्षण कायद्यानुसार गुन्हा नोंद करण्यात आला.

ज्ञानोबा पांडुरंग वाघमारे (७२) असे फसवणूक झालेल्या निवृत्त कर्मचाऱ्याचे नाव आहे. ते माजलगावातील केसापुरी कॅम्प भागात वास्तव्यास आहेत. माजलगावातील रमेश प्रभाकर जाधव व इतरांनी त्यांचा विश्वास संपादन करून चांगल्या व्याजाचे आमिष दाखवत जीवनश्री नागरी पतसंस्थेत वाघमारे यांना १८ लाख ९५ हजार ६०० रुपयांची मुदत ठेव करण्यास भाग पाडले.

वाघमारे यांनी १५ जुलै २०१७ रोजी ही मुदत ठेव केली याची मुदत १ नोव्हेंबर २०२१ रोजी संपली मात्र त्यानंतरही पतसंस्थेने त्यांचे पैसे दिले नाही. वारंवार मागणी करुनही पैसे मिळत नसल्याने वाघमारे यांनी अखेर पोलिसांत धाव घेतली. या प्रकरणी पतसंस्थेचे रमेश प्रभाकर जाधव, वैजयंताबाई प्रभाकर जाधव, प्रभाकर विठ्ठल जाधव आणि प्रवीण लालासाहेब ओव्हाळ या अध्यक्ष, उपाध्यक्ष, सदस्य आणि सचिवाविरोधात गुन्हा नोंद करण्यात आला आहे. तपास सहायक पोलिस निरीक्षक नीलेश इधाते हे करत आहेत.