दिव्य मराठी विशेष:स्तन कर्करोग जनजागृती अभियान गरजूंपर्यंत पोहोचावे‎ ; महाविद्यालयात अभियानास सुरुवात‎

स्तनाचा कर्करोग हा महिलांत सर्वाधिक‎ प्रमाणात आढळणारा कर्करोग आहे. हा‎ कर्करोग शरीराच्या इतर भागात‎ झपाट्याने पसरतो. म्हणून या आजाराचे‎ निदान व उपचार लवकरात लवकर‎ करणे गरजेचे आहे. स्वाराती वैद्यकीय‎ रुग्णालय व महाविद्यालयात सुरु‎ असलेल्या स्तन कर्करोग जनजागृती व‎ उपचार मोहिमेचा लाभ सर्व स्तरातील‎ गरजू महिलांपर्यंत पोहोचावा, असे‎ आवाहन युवा नेते अक्षय मुंदडा यांनी‎ केले.‎ वैद्यकीय शिक्षण व द्रव्ये औषधी‎ विभागातर्फे राज्यभरात स्तन कर्करोग‎ जनजागृती व उपचार अभियान राबवले‎ जात असून या अभियानाचे स्वामी‎ रामानंद तीर्थ ग्रामीण शासकीय वैद्यकीय‎ महाविद्यालयात युवा नेते अक्षय मुंदडा,‎ अधिष्ठाता डॉ.भास्कर खैरे, डॉ.शुभदा‎ लोहीया, शल्य चिकित्सा विभाग प्रमुख‎ डॉक्टर नितीन चाटे यांच्या उपस्थितीत‎ उद्घाटन झाले यावेळी मुंदडा हे बोलत‎ होते. नोडल अधिकारी डॉ.नितीन चाटे‎ यांनी प्रास्ताविक करताना या‎ अभियानामागील भुमिका स्पष्ट केली. ८‎ मार्चपासून दर बुधवारी दुपारी १२ ते २ या‎ वेळेत स्वाराती रुग्णालयातील ओपीडी‎ क्रमांक दोनमध्ये या अभियानासाठी‎ विशेष बाह्यरुग्ण कक्ष सुरु केला गेला‎ असून तेथे स्तन कर्करोग, स्वय स्तन‎ तपासणी व संबंधित माहिती, समुपदेशन‎ व उपचार मोफत केले जातील, अशी‎ माहिती दिली.

अधिष्ठाता डॉ.भास्कर‎ खैरे यांनी शासनामार्फत मंत्री गिरीश‎ महाजन यांच्या मार्गदर्शनाखाली सुरु‎ असलेल्या स्थुलता निवारण, स्तन‎ कर्करोग या मोहीमांसह आगामी काळात‎ हाडाचा ठिसुळपणा, थायरॉईड आजार‎ आदींबाबत देखील जनजागृती मोहीम‎ राबवली जाणार असल्याचे सांगितले.‎ यावेळी डॉ. शुभदा लोहीया,‎ डॉ.सिद्धेश्वर बिराजदार, डॉ. देव,‎ अधिपरिचारीका भताने, पत्रकार‎ अविनाश मुडेगावकर, रवि मठपती,‎ सामाजिक कार्यकर्ते भागवत मसने,‎ डॉ.अमित लोमटे, डॉ.नागेश अब्दागिरे‎ आदी उपस्थित होते. सूत्रसंचालन‎ डॉ.चिन्मय इंगळे यांनी केले तर आभार‎ डॉ.सतिश गिरेबोईनवाड यांनी केले.‎

लक्षणे जाणवल्यास तातडीने तपासणी करून घ्यावी‎ स्तनाच्या कर्करोगाचे प्राथमिक अवस्थेत निदान झाल्यास रुग्णास कमी हानी होते व जीवनमान सुधारते असे दिसुन‎ येते . स्तनाच्या कोणत्याही भागात गाठ तयार होणे अथवा वेदना होणे, स्तनावर सूज येणे, जळजळणे अथवा डाग‎ पडणे, स्तनाग्रातून रक्त येणे, लालसर होणे, वेदना होणे आत खेचले जाणे, स्तनांच्या आकारात बदल दिसणे,‎ अशी साधारण स्तन कर्करोगाची लक्षणे आहेत. यातील कुठलीही लक्षणे जाणवल्यास तातडीने तपासणी करून‎ घ्यावी, असे आवाहन नोडल अधिकारी डॉ.नितीन चाटे यांनी केले.‎